VIKEKE, 06 Maiu 2025 (TATOLI)—Komité Paralimpiku nasionál Timor Leste (CPNTL, sigla portugés) instala ona pontu fokál na’in-rua (2) iha munisípiu Vikeke hodi halibur talentu husi ema ho defisiénsia sira.
Sekretáriu Jerál CPNTL, José da Silva Monteiro, hateten CPNTL harii iha Timor-Leste iha tinan 2004 no agora sai ona membru ba Internasionál Paralimpiku Komité (IPK) iha nasaun Jerman, organizasaun Asian Suport Federasaun (ASF) iha nasaun Tailandia no Asian Suport Comite iha nasaun Dubai, nune’e CPN Timor Leste sai ona membru permanente ba organizasaun sira-ne’e.
“Nune’e, ita involve ona iha desportu nasionál no internasionál, maibé seidauk ba munisípiu sira. Tanba ne’e, agora ami koloka pontu fokál iha nivel munisípiu sira hanesan munisípiu Vikeke, Lautéin, Baukau no Bobonaru. Ne’ebé, munisípiu haat ne’e mak ba faze dahuluk. Depois tinan oin mak ba tan munisípiu seluk,” José da Silva Monteiro hateten iha salaun administrasaun munisípiu Vikeke, ohin.
Nia hateten, CPNTL parseiru ho Ministériu Juventude Desportu no Kultura (MJDK) ne’ebé fó apoia ba CPNTL hodi hala’o servisu, no iha ona nasionál federasaun hamutuk 10 mak hamahon aan iha CPNTL.
“Ita partisipa ona desportu iha fatin inklui internasionál no hetan medalla. Maibé, agora atleta sira-ne’e hetan medalla ne’e maioria idade ona, entaun ita tenke promove ateleta sira seluk. Ita-nia atleta barak mak iha munisípiu, nune’e munisípiu mak sai ita-nia alvu para aban bain-rua ba oin. Kuandu festivál ruma iha Díli ateleta husi munisípiu Vikeke bele tun. Se lae, ami iha Díli de’it mak partisipa festivál sir, maibé munisípiu lahatene buat ida,” nia hateten.
Tanba ne’e, nia dehan, objetivu ida-ne’e mak CPNTL mai Vikeke no ba oin sei envolve mós diretór eskola sira iha Vikeke tanba labarik ema ho defisiénsia (EhD) barak mak iha eskola, maske sira iha talentu desportu maibé ema atu mobiliza sira seidauk iha.
“Tanba ne’e, ami husu prezidente autoridade munisípiu Vikeke ninia autorizasaun, ba oin ita bele servisu hamutuk. Ami mós hakarak servisu besik liután ba ita-nia komunidade iha munisípiu Vikeke liuliu labarik ema ho defisiénsia barak, maibé seidauk hatene oinsá envolve aan iha CPNTL,” nia hateten.
Tanba ne’e, CPNTL koloka pontu fokál na’in-rua ne’ebé kompostu husi adjuntu koordenadór no na’in-ida (1) sai pontu fokál iha Vikeke hodi hala’o servisu iha nivél munisípiu.
Aleinde ne’e, nia hato’o agradesimentu ba Autoridade Vikeke ne’ebé koopera no servisu hamutuk ho CPNTL, atu ba oin CPNTL Vikeke bele mobiliza joven ema ho defisiénsia sira-ne’ebé iha talentu ba desportu.
Sekretáriu munisípiu Vikeke Asuntu Sosiál no organizasaun Komunitária, Acacio de Souza, haktuir foin primeiru CPNTL mai iha munisípiu Vikeke no ba oin bele halibur ema ho defisiénsia sira iha aldeia, suku, postu no munisípiu.
“Pontu fokál iha ona munisípiu tenke halo identifikasaun ba ita-nia ema ho defisiénsia sira, atu sira bele inklui iha parte desportivu sira. Tanba, ita iha edukasaun inkluzivu ne’ebé ema hotu partisipa iha desportu sira. Ita labele haree ninia defisiénsia maibé ita haree ba ninia abilidade ka matenek sira. Ami sei hato’o ba autoridade suku sira hodi identifika ita-nia ema ho difisiénsia sira iha kada suku sira,” nia dehan.
Jornalista : Vitorino Lopes da Costa
Editór : Cancio Ximenes
