BAUKAU, 07 Abríl 2025 (TATOLI)—Autoridade Administrasaun Munisipál (AAM) Baukau, kuarta ne’e, aprova programa prioridade hamutuk 20-resin liuhosi reuniaun Konsellu Koordenasaun Munisipál (KKM) ne’ebé sei kontinua iha Planu Asaun Anúal (PAA) tinan 2026.
Prezidente Autoridade Munisipál (PAM) Baukau, Veneranda Lemos Martins, esplika programa hirak-ne’e konsideradu importante no deside tuir povu ne’ebé hato’o iha Konsellu Suku, aprova iha Asembleia Postu Administrativu (ASPA) no kontinua hetan aprovasaun iha reuniaun Konsellu Koordenasaun Munisipál (KKM).
“Ita sei halo preparasaun halo di’ak para lori bá Komisaun Revizaun Orsamentál (KRO). Espera katak labele hetan korte boot,” Prezidente Autoridade Munisipál Baukau, iha salaun apuramentu Vila Nova, Baukau.
Eis deputada ne’e, salienta husi projetu 20-resin sei ajusta iha Programa Dezenvolvimentu Integradu Munisipál (PDIM) tinan oin hanesan setór edukasaun, saúde, agrikúltura no seluk tan ne’ebé sei kontinua hetan apresiasaun no aprova liuhosi reuniaun Konsultivu Munisipál antes sai nu’udár PAA.
“Depende ba KRO, maibé ita halo aprezentasaun mak hateten, bainhira Baukau hetan hotu projetu 20-resin ne’e, graças a Deus,” Veneranda Lemos akresenta.
Entretantu, Konsellu Koordenasaun Munisipál bazeia ba Dekretu-lei númeru: 3/2016 no Dekretu-lei númeru 3/2020 ne’ebé tuir regulamentu realiza ho prezensa membru na’in-47 ka kórun 2/3 husi tótal membru 64 kompostu husi Prezidente Autoridade Munisipál, Sekretáriu Munisipál, Administradór Postu Administrativu no Xefe Suku.
Jornalista: Natalino Belo
Editór: Xisto Freitas da Piedade
