APC sei identifika fatin evakuasaun ba abitante Ailembata Babulu
VIKEKE, 07 Maiu 2025 (TATOLI)—Prezidente Autoridade Protesaun Sivil (APC, sigla portugés), Jesuino dos Reis Matos Carbalo, informa APC sei identifika fatin sentru evakuasuan ba abitante suku Babulu, postu Uatulari, munisípiu Vikeke.
“Nu’udár responsablidade mak halo sensiblizasaun ba komunidade oinsá hasees-aan husi risku dezastre naturál. Nune’e, ami sei koordena ho autorudade lokál sira identifika fatin ida sai sentru evakuasaun ba dezastre naturál iha suku Babulu,” Jesuino dos Reis Matos Carbalo hateten ba jornalista sira iha suku Babulu, ohin.
Jesuino hatutan, APC sei ko’alia mós Prezidente Autoridade Munisípiu (PAM) Vikeke no Ministériu Edukasaun (ME) hodi deside edifísiu eskola sira-ne’ebé iha suku Babulu hodi sai fatin evakuasaun.
“Bainhira ita deside ona fatin evakuasaun, ita sei haree mós kondisaun oinsá hadi’a ninia kondisaun ruma, bainhira akontese karik iha fatin sentru evakuasaun ne’ebé dignu hodi evakua vítima sira hela iha laran. Tan ne’e, ha’u sei ko’alia ba PAM Vikeke no ME, atu ita bele deside fatin sentru evakusaun ba komundiade,” nia dehan.
Aleinde ne’e, nia dehan, dezastre akontese la’ós husi tasi, foho no mota, maibé akontese mós inséndiu ne’ebé mai husi bai-loron naruk, balun akontese sirkuitu eletrisidade hodi hamosu ahi han uma.
“Tanba ne’e, ita tenke ajuda malu bainhira mosu dezastre naturál, ne’ebé akontese ita la espera. Ha’u husu ba inan-aman sira bainhira akontese dezastre labele haree ba ita-nia aan de’it, maibé ita tenke tulun malu hodi lori sai ita-nia maluk sira-ne’ebé hetan dezastre naturál,” nia dehan.
Nune’e mós, nia hateten, APC planeia ona atu halo kampaña prevensaun ba risku dezastre naturál no sensiblizasaun ba komunidade.
“Ami mós hanoin ona atu kampaña nasionál ba prevensaun dezastre naturál no sensiblizasaun ba ita-nia komunidade sira. Atu hases aan husi dezastre naturál hanesan tasi sa’e, mota sae, inséndiu, rai halai (erosaun) no seluk tán,” nia dehan.
Jornalista : Vitorino Lopes da Costa
Editór : Cancio Ximenes
