BAUKAU, 05 Abríl 2025 (TATOLI)—Progresu ezekusaun orsamentu ba Programa Merenda Eskolár tinan 2025 iha Munisípiu Baukau atinje pursentu 28.
Xefe Departamentu Parke Eskolár, Sabino Arlindo Ximenes, esplika implementasaun Programa Merenda Eskolár faze dahuluk hahú implementa iha inísiu Fevereiru to’o 25 Marsu ho totál loron efetivu 35 ne’ebé ezekuta pursentu 28.
“Foin daudaun ita aprezenta bá munisípiu iha ona 28% ba primeira faze iha loron efetivu 35,” Xefe departamentu Parke Eskolár Edukasaun Baukau hateten iha ninia kna’ar fatin, Vila Nova, Baukau, segunda ne’e.
Sabino Ximenes esplika, husi pursentu 28 referidu maihusi totál orsamentu ne’ebé aloka ba tinan 2025 hamutuk $261.990.00, husi totál benefisiáriu hamutuk estudante 32.730 ne’ebé asesu ba programa referidu.
Nia argumenta, Edukasaun Baukau tuir planu kontinua implementa programa referidu ba faze daruak iha Maiu ne’ebé númeru benefisiáriu aumenta 263 tanba iha trimestrál daruak estudante hirak-ne’e transferénsia husi munisípiu seluk.
“Faze daruak ita hasa’e ba loron efetivu 40 ho totál estudante 32.993,” Sabino Ximenes akresenta.
Entretantu, Autoridade Administrasaun Munisipál iha tinan ne’e aloka orsamentu ba Programa Merenda Eskolár hamutuk $261. 990.00 ne’ebé transfere direta ba bankária eskola hamutuk 230 kompostu husi eskola pre-eskolár, ensinu báziku privadu no públiku.
Programa Merenda Eskolár ne’e benefísia ba estudante hamutuk 32.993, ho totál loron efetivu hamutuk 150 ne’ebé bazeia ba livru matadalan fahe ba pursentu 75% husi produtu lokál no pursentu 25 produtu importadu.
Jornalista: Natalino Belo
Editór: Xisto Freitas da Piedade
