DILI, 07 Maiu 2025 (TATOLI) – Governu aprova estatutu foun Universidade Nasionál Timor Lorosa’e (UNTL) nian, ne’ebé aprezenta husi Ministru Ensinu Superiór, Siénsia no Kultura, José Honório da Costa, no husi Reitór UNTL, João Soares Martins.
Tuir nota husi Governu, reformulasaun estatutu UNTL nian hodi ajusta ninia estrutura organizasionál no jestaun hodi korresponde di’ak liu ba ejizénsia atuál ensinu superiór nian.
“Ninia objetivu atu garante organizasaun ida-ne’ebé efisiente no adaptada liu ba nesesidade foun instituisaun nian, reforsa ninia misaun atu kria, habelar no aplika koñesimentu ba dezenvolvimentu nasionál”, dokumentu ne’e dehan.
Estatutu foun UNTL nian introdús alterasaun signifikativa iha estrutura interna universidade, inklui kriasaun órgaun foun sira no define filafali kompeténsia órgaun balun ne’ebé eziste ona.
Alterasaun sira-ne’e ho objetivu atu otimiza jestaun universidade, promove interdixiplinaridade ne’ebé boot liu iha ensinu no investigasaun, no garante utilizasaun rekursu ne’ebé di’ak liu.
Estatutu anteriór UNTL nian, Dekretu-Lei n.u 16/2010, loron 20 fulan-Outubru, sei revoga bainhira diploma ida-ne’e tama iha vigór.
Notísia relevante: MESSK dezafia João Martins revee estatutu UNTL
Jornalista: Arminda Fonseca
Editora: Maria Auxiliadora
