PAM Baukau preokupa progresu reabilitasaun estrada Laga-Baguia
BAUKAU, 07 Maiu 2025 (TATOLI)—Prezidente Autoridade Munisipál (PAM) Baukau, Veneranda Lemos Martins, preokupa no konsidera kompañia responsável tarde durante reabilita estrada diresaun Postu administrativu Laga bá Baguia, Munisípiu Baukau.
“Ha’u informa ona ba Ministru Obra Públika, ha’u dehan favór ida husu responsabilidade ba kompañia ne’e,” Veneranda Lemos ba jornalista iha Vila Nova, Baukau, kuarta ne’e.
Eis deputada ne’e salienta, tuir kontratu, projetu referida finaliza ho durasaun serbisu fulan-18, maibé realidade iha terenu estrada diresaun Laga-Baguia to’o atuál lahatudu progresu másimu nune’e difikulta movimentu transporte públiku.
“Iha parte Atelari nian bee nalihun boot. Ida-ne’e laiha responsabilidade. Nasionál tenke tau responsabilidade ba kestaun ne’e,” Veneranda lamenta.
Entretantu, projetu reabilitasaun estrada diresaun Postu Administrativu Laga no Baguia lansa fatuk dahuluk iha tinan 2022 ne’ebé responsabilidade husi Kompañia Norinco International Cooperation ho nia orsamentu hamutuk millaun 21.7 no totál kilómetru 38 ne’ebé tuir durasaun kontratu hamutuk fulan-18.
Jornalista: Natalino Belo
Editór: Xisto Freitas da Piedade
