BAUKAU, 07 Maiu 2025 (TATOLI)—Administrasaun Postu Administrativa Kelikai Antiga, hato’o proposta lima hodi ajusta iha Planu Asaun Anuál (PAA) ne’ebé aprova liuhosi reuniaun Konsellu Koordenasaun Munisipál (KKM).
Administradór Postu Administrativu Kelikai Antiga, Francisco Matias Gusmão, esplika proposta lima ne’ebé hato’o konsideradu importante no urjente nune’e autoridade postu aprova liuhosi reuniaun Asembleia Postu Administrativu (ASPA) no iha esperansa bele hetan konsiderasaun iha Komisaun Revizaun Orsamentál (KRO).
“Maski Administrasaun ida-ne’e foun, hanesan administradór iha esperansa proposta ne’ebé hato’o hetan konsiderasaun tanba prioridade,” Administradór Postu Administrativu Kelikai Antiga dehan iha Arredór Administrasaun Munisipál Vila Bova, Baukau, kuarta ne’e.
Proposta lima referida kompostu tolu ne’ebé ajusta iha AAM liuhosi Programa Dezenvolvimentu Integradu Munisipál (PDIM) hanesan estrada diresaun Gurusá ba postu purvolta kilómetru 6.5, diresaun Namanei ba postu hamutuk kilómetru 7-resin no kanalizasaun bee-moos husi Uasunana ba edifísiu públiku no komunidade.
Enkuantu, proposta liuhosi fundu infraestrutura hamutuk rua kompostu husi estrada diresaun Daelari ba postu no estrada inklui konstrusaun ponte husi Gurusá bá postu ne’ebé konsideradu presiza hadi’a hodi fasilita movimentu transporte públiku.
“Proposta ne’e importante liuliu estrada tanba fó asesu ba komunidade hodi halo movimentu,” Francisco Gusmão informa.
Postu administrativu Kelikai Antiga estabelesidu liuhosi alterasaun dalatoluk Dekretu-lei númeru: 11/2019, loron 07 Outubru, kona-ba Devizaun Administrativa Territória ne’ebé haketak Postu Kelikai ba postu tolu hanesan Matebian, Kelikai no Kelikai Antiga.
Entretantu, Postu Administrativu Kelikai Antiga hamutuk suku lima kompostu husi Afasá, Namanei, Uaitame, Gurusá no Abafala ho totál populasaun hamutuk 11.227 husi totál uma-kain 2.684
Jornalista: Natalino Belo
Editór: Xisto Freitas da Piedade
