OEKUSI, 08 Maiu 2025 (TATOLI) – Xefe Suku Bobometo sub-rejiaun Oésilo, José Labi Caet, husu Governu liuhusi Ministériu atu harii mini prizaun ida iha Rejiaun Administrativa Espesiál Oekusi Ambeno (RAEOA) atu fasilita família sira bele hala’o vizita ho distánsia besik.
Lideránsa komunitáriu ne’e, hato’o nia rekomendasaun ne’e iha ámbitu sosializasaun enkudramentu legál ualu, iha sede suku Bobometo sub-rejiaun Oésilo.
Notísia relevante:Defensór Públiku propoin harii prizaun iha RAEOA
“Ha’u husu sei bele loke mini prizaun ida iha Oekusi, tanba ami-nia família tama komarka, ami bele ba vizita besik, durante ami-nia preokupasaun mak ne’e atu ba Díli presiza osan, too Dili hela fatin laiha, ami-nia família barak tama to’o tinan lima to’o neen ona, maibé ami la ba haree sira iha Bekora no Ermera tanba problema sira-ne’e, enatun sei bele harii netik ida iha Oekusi nune’e ami bele ba vizita sira besik,” nia rekomenda.
Iha fatin hanesan, Xefe Suku Usitaqueno, Francisco Elo, reforsa-taan, família balun tama to’o tinan 10 ona maibe labele ba vizita sira iha prizaun tanba problema ekonómia no hela fatin iha Dili laiha.
“Ha’u reforsa de’it xefe suku Bobometo, ne’e tenki tanba exemplu, ami husi Oésilo atu ba vizita sira karik, sa’e karreta husi Oesilo tuun ba Oekusi vila, depois mak sa’e roo ba Dili, depois too Dili kuandu família laiha atu toba iha ne’ebé, ida-ne’e mak problma ba ami durante ne’e infrenta,” nia infroma.
Hataan ba rekomendasaun ne’e, DefensóriaPúblika, Cancio Xavier, rekoñese, la’os akontese de’it iha Oekusi maibé preokupasaun ne’e hanesan mós ho komunidade sira iha parte leste.
“Prizaun ne’e nu’udar parte integrante asistente jurídika ida-ne’ebé mai husi defensória públika, tanba ema sira-ne’ebé tama prizaun ne’e, defensória públika ninia kliente sira, tan ne’e bainhira kuandu preokupasaun sira mai husi família sira, ne’e sai hanesan preokusaun defensória públika nian, ida-ne’e Ministériu Justisa nia kompeténsia atu-bele haree, maibé iha Oekusi Prezidente Autoridade atu-bele kanaliza asuntu direita ba Ministériu Justisa, hodi hato’o direita tau iha planu,”.
Tuir nia problema ne’e hanesan mós ho komunidade sira husi parte leste, tanba Vikeke Baukaun ho Lospalós mós bainhira atu vizita família iha Bekora ka Ermera susar tebes, tanba haree ekonómia la sufisiénte, entaun balut ama to’o tinan 10 mós família ida nunka ba haree tanba problema distánsia ho ekonómia.
Jornalista: Abílio Elo Nini
Editór: Florencio miranda Ximenes
