DILI, 08 Maiu 2025 (TATOLI) – Autoridade Munisipál Dili (AMD) liuhusi Diresaun Saneamentu kontinua halo limpeza no jestaun ba lixu iha kapitál Dili hodi asegura saúde públika ba ema hotu ho ekipamentu modernu no ekipamentu baibain.
Atu garante ambiente moos no saudavel, Prezidente Autoridade Munisipiu (PAM) internu hanesan mós Diretór jerál dezentralizasaun governu lokál, António Agosto Guterres informa, AMD iha ekipamentu modernu hanesan karreta dasa fo’er no rega estrada.
“Ita-boot (jornalista) sira haree, konkretiza iha terenu kareta rua ne’e mak para iha ne’e (iha AMD), no ita mós tau osan ba manutensaun no kombustivél”, PAM Dili interinu ba jornalista TATOLI iha AMD, Dili, ohin.
“Ita mós akompaña lansamentu nasionál ba limpeza ne’e sei hala’o iha loron sesta-sesta, no daudaun sei prepara ekipamentu ba utilizasaun limpeza, ne’e iha prosesu hela no ekipamentu balun mai tiha ona no balun seidauk no sasan ki’ik-oan sira-ne’e sei fornese ba saneamentu”, PAM interinu ne’e hateten.
Aleinde ne’e, tuir autoridade ne’e katak daudaun ne’e kamioneta ne’ebé kontratu hodi jere no halo jestaun ba lixu hamutuk 75, ne’e fahe ba postu haat hanesan, Dom Aleixo, Vera Kruz, Na’in Feto no Kristu Rei, no ekipa pasa revista ba kamioneta ra’ut fo’er iha fatin rua; ida iha Tasi-tolu no ida seluk iha Tibar.
“Ekipa pasa revista ba kamioneta ra’ut foer husi postu haat iha kapitál Dili ne’e, baibain sempre halo revista katak sira ra’ut foer nakonu kalae, nune’e bele rejistu. Entaun, ema hirak iha ne’e mak ita orienta hala’o hela servisu ida-ne’e para oinsá jere lixu iha Dili laran ho di’ak”, eis-PAM Baukau ne’e informa.
Entretantu totál kamioneta ra’ut fo’er hamutuk 75 kompostu husi Dom Aleixo Lot A iha kamioneta 18, iha Lot B 16, postu Vera Kruz kamioneta 15, postu Na’in Feto iha kamioneta 16 no postu Kristu Rei iha kamioneta sanulu.
Aleinde ne’e pesoál limpeza fahe ba grupu haat hanesan, ekipa dasa estrada hamutuk 24, ekipa dasa jardin 19 to’o 32, ekipa tesi du’ut na’in-15 no ekipa servisu valeta na’in-25. Enkuantu, totál ekipamentu karreta tanke bee iha neen, karreta kamioneta hitu no karreta operasionál iha rua.
Transporte modernu sira ne’e nia kombustível husi empreza ETO tanba seluk la iha. Enkuantu, fasilidade seluk ba halo jestaun lixu ho rotina hanesan ai-sar, plástiku no máskara, nafatin halo kuotasaun.
Jornalista: Alexandra da Costa
Editór: Rafael Ximenes de A. Belo
