KOVALIMA, 08 Maiu TATOLI (2025) – Autoridade Munisípiu (AM) Kovalima, realiza ona enkontru ba daruak hodi forma komisaun no kada sesaun aprezenta estimasaun orsamentu hodi prepaara atu komemora loron nasionál 20 Maiu ba dala-23, iha munisípiu Kovalima.
Prezidente Komisaun Organizadora (KO) 20 Maiu, Albeto Moniz de Araújo, dehan, bazeia ba rezulta enkontru ba daruak no kada komisaun aprezenta, estimasaun orsamentu nune’e autoridade Kovalima aloka orsamentu rihun ualu, hodi finansia atividade ba komemorasaun Loron Restaurasaun Independénsia ne’e.
“Atu komemora loron nasional 20 Maiu ba dala-23, ami realiza enkontru ba dahuluk forma komisaun organizadora prepara atu komemora loron independénsia 20 Maiu ba dala 23. Ohin ami kontinua enkontru konsolidasaun kada seksaun aprezenta sira-nia estimasaun orsamentu ne’ebé Governu koloka orsamentu ba loron nasionál tolu hanesan 20 Maiu, 30 Augusto no 28 Novembru”, Albeto Moniz de Araújo, informa ba TATOLI, hafoin finaliza enkontru iha AMC, ohin.
Prezidente KO esplika, kolokasaun orsamentu rihun ne’e sei aloka ba postu administrativu hitu hanesan Postu administrativu Zumalai aloka $ 1,200, tanba Zumalai iha nia suku Ualu ho aldeia 34.
Alokasaun orsamentu ba iha Postu administrativu Suai $650 tanba hamutuk ho munisípiu Kovalima, Tilomar $800, Fatumea $ 750, Fohorem $800, Fatululik $ 750 tanba iha suku rua de’it no postu Maukatar $ 800.
Kovalima atu hala’o atividade prinsipál koloka orsamentu boot ba seksaun programa atu halo preparasaun polísia atu treinu ekipa isar bandeira konsumu, lojístika aluga kadeira, monta ahi no seluktan.
Alokasaun orsamentu rihun ualu aloka iha munisípiu hamutuk 2,250 hodi fahe ba seksaun 12 hodi bele halo preparasaun atu realiza serimónia komemorasaun loron Nasionál 20 Maiu iha Kovalima.
Ho nune’e nia dehan, seksaun 12 ne’ebé hari ona mak hanesan, sekretáriu, seksaun programa, seksaun lojístika, konsumu, dekorasaun, liturjia, iluminasaun, mobilizasaun, primeiru sukorru, limpeza, dokumentasaun no seguransa.
“Komemorasaun 20 Maiu tinan ne’e la iha atividade animasaun no loke feira tanba bazeia ba orientasaun ita iha ona komemorasaun 28 Novembru MAE tau programa bolu dehan feira espozisaun dezenvolvimentu sei realiza iha Dili”, nia dehan.
Jornalista:Celestina Teles
Editór: Rafael Ximenes de A. Belo
