Janeiru-Abríl: BTL Vikeke rekolla taxa rihun $9-resin ba kofre Estadu
VIKEKE, 08 Maiu 2025 (TATOLI)—Koordenadór Bee Timor Leste, Empreza Públika (BTL, E.P) munisípiu Vikeke, Marito da Costa, informa hahú husi Janeiru to’o Abríl ne’e BTL, E.P munisípiu Vikeke konsege rekolla taxa hamutuk rihun $9,082.20 ba kofre Estadu.
“Reseita sira-ne’e ita hetan husi komunidade nne’ebé monta ona metru kontadór bee-moos nian iha kada uma-kain,” Marito da Costa hateten ba Agência Tatoli iha nia kna’ar fatin, ohin.
Koordenadór BTL Vikeke ne’e subliña, kona-ba selu taxa ba utilizasaun bee-moos iha kapitál Vikeke, konsumedór sira hanesan komunidade selu direta iha edifísiu BTL, E.P munisípiu Vikeke kada semana, depois sesta lokraik funsionáriu BTL, E.P lori reseita sira-ne’e ba hatama iha banku.
Nia informa, instituisaun Governu, Ajénsia Internasionál sira-ne’e selu direta ba banku, depois lori resivu mai BTL, E.P hodi halo justifikasaun ba sistema.
“Kona-ba kustu selu ne’e depende ba utilizasaun husi ita-nia konsumidór sira gastu kada kubiku ida ami aplika klinte baiain (komunidade) selu sentavu $0,20. Maibé, ba empezáriu sira hanesan loke restaurnte, Otel, indústria gallon aplika selu sentavu $0,60,” nia dehan.
Bee urbana iha munisípiu Vikeke ne’e, BTL, E.P instala ona metru kontadór hamutuk 703 no uma kain hamutuk 500 mak seidauk motan kontadór tanba debitu bee mak la sufisiente, tanba ne’e mak seidauk monta metru kontadór bee-moos nian ba kliente sira.
“Ami sei esforsu hela, atu bele finaliza metru kontadór ba uma kain 500 ne’ebé seidauk monta. Ami mós sei halo jestaun ba bee ne’ebé iha hodi ita-nia komunidade bele asesu ba bee-moos,” nia hateten.
Tuir dadús, taxa ne’ebé rekolla tuir kada fulan mak iha fulan-Janeiru ne’e BETL, E.P rekolla hamutuk $2,444, Fevereiru rekolla hamutuk $2,703.20, Marsu rekolla hamutuk $2,012 no fulan-Abríl rekolla hamutuk $1,923 hodi kontribui ba kofre Estadu.
Daudaun ne’e, funsionáriu BETL, E.P munisípiu Vikeke totál hamutuk na’in-14 ne’ebé kompostu husi koordenadór, tékniku operadór, apoiu kliente.
Jornalista : Vitorino Lopes da Costa
Editór : Cancio Ximenes
