VIKEKE, 08 Maiu 2025 (TATOLI)—Koordenadór Bee Timor Leste, Empreza Públika (BTL, E.P) munisípiu Vikeke, Marito da Costa, relata progresu projetu sistema melloramentu bee urbana iha postu Ossú Vila, munisípiu Vikeke empreza responsavél instala ona metrU kontadór bee-moos ba uma kain 475.
“Progresu servisu sistema melloramentu bee-moos ne’ebé ita implementa iha postu administrativu Ossú ne’e, daudaun ne’e ita-nia empreza sira finaliza ona metru kontadór hamutuk unidade 475. Maske instalasaun metru kontadór ramata ona, maibé agora ita seidauk distribui bee ba komunidade sira asesu,” Marito da Costa hateten ba TATOLI, iha ninia kna’ar fatin, Beloi, ohin.
Nune’e, nia dehan, daudaun empreza kontinua halo limpeza ba Sistema kanaluzasaun (kanu) no hadi’a tuir metru kontadór sira-ne’ebé monta ona ba kada uma-kain sira iha postu Ossú Vila laran.
“Iha tempu besik, ita sei halo inaugurasaun ba projetu sistema bee-moos ba postu Ossú nian. Nune’, agora daudaun ne’e ita-nia empreza kontinua esforsu hodi finaliza projetu referida. Kona-ba dezafiu ne’ebé durante ne’e empreza enfrenta mak klíma udan sai difiklulta ba empleta obra, maibé ita fiar katak iha fulan-Juñu nian obra sei hotu,” nia dehan.
Nia realsa, projetu sistema bee-moos iha postu Ossú daudaun ne’e atinje ona 95%, hela servisu ida mak agora empreza kanaliza kanu korta estrada sorin nune’e empreza agora sei koordena empreza halo estrada hodi dada kanu ba estrada sorin, entaun finaliza ona projetu. Ba projetu sistema bee-moos postu Ossú finaliza tempu retensaun fulan tolu.
Ba sistema bee-moos, nia subliña, sitema bee-moos ba postu Ossú BTL, E.P foti bee-matan rua lokaliza iha Ossú mak hanesan bee-matan Uaikirona no bee-matan Uaibua, maibé debit bee la sufisiente ba postu tomak.
Entretantu, projetu melloramentu sistema bee-moos ba postu Ossú implementa husi empreza CDFG Unipesoal, Lda, reabilita tenke tolu no dada kanu husi bee-matan, ho totál kustu hamutuk $421,901.57 husi projetu ne’e benifísia ba 2.850 husi uma kain 475.
Jornalista : Vitorino Lopes da Costa
Editór : Cancio Ximenes
