Udan boot afeta estrada Tilomar liga ba Fatumea kotu
KOVALIMA, 08 Maiu TATOLI (2025) – Udan boot ne’ebé akontese iha Munisípiu Kovalima, afeta ba estrada husi Postu administrativu Tilomar liga ba Fatumea kotu hodi difikulta movimentu transporte públiku husi kapitál munisípiu ba postu no husi postu mai kapitál munisípiu.
Joven husi Postu administrativu Fatumea, Munisípiu Kovalima, Julio Ferreira, informa katak ho tempu klima udan no prejudika estrada kotu nune’e difikulta komunidade sira atu halo movimentu ho transporte.
“Estrada husi Tilomar liga ba postu Fatumea, tempu udan hanesan, haree kondisaun estrada grave hodi difikulta no lori risku atu movimentu ho transporte públiku no privadu sira nune’e sira difisil atu mai iha kapitál munisípiu atu fa’an sira-nia produtu iha merkadu no nesesidade seluk”, Julio Ferreira, dehan informasaun ne’e ba TATOLI, iha Kampung baru, ohin.
Difikulta movimentu tanba udan boot nune’e iha parte balun estrada kotu no iha parte balun sedimentasaun taka estrada nune’e bainhira halo movimentu komunidade sira selu de’it sidaudaun balun ne’ebé hulan motorizada ki’ik selu $ 5.00 no motorizada boot selu $ 10.
Razaun sidadaun ne’ebé hulan motorizada selu joven sira, tanba ho udan boot ne’ebé akontese kauza sedimentasaun taka estrada nune’e motorizada ki’ik no boot labele ultrapasa. Bainhira atu ultrapasa presiza hulan motorizada.
Estrada ne’ebé daudaun kotu husi Tilomar liga ba Fatumea mak hanesan estrada husi Aldeia Maubessi postu Tilomar liga ba Fatumea. Estrada iha Aldeia Makokon, suku Nanu iha área Tohubuli, Aibetun lolon no iha área Marikolumbus.
Aleinde ne’e, estrada kotu iha postu Tilomar liga ba Fatumea, iha suku Fatumea, aldeia Mota ulun estrada kotu kilometru 20 to’o kilometru 50, maibé to’o ohin loron ekipamentu pezadu seidauk halo normalizasaun.
Ho kondisaun estrada referida, hanesan Joven husi Fatumea husu ba Servisu munisipál obrá publika atu halo normalizasaun hodi suru sai sedimentasaun ne’ebé taka estrada no normaliza estrada kotu nune’e bele fasilita movimentu transporte públiku no privadu.
Hatan ba kestaun ne’e, Diretór servisu munisipál obra públika, Sidonio Gusmão, responde katak daudaun ne’e nia parte orienta ona funsionáriu obra públika atu halo levantamentu dadus pontuasaun estrada ne’ebé mak atu halo normalizasaun ho urjénsia.
“Ba dahuluk ami presiza ba iha terrenu atu observa direta nune’e nia parte orienta ona ba funsionáriu ba terrenu atu observa hafoin prosesu kontinuasaun ita submete pedidu normalizasaun ba iha IGE,I.P atu halo normalizasaun”, nia responde.
Dirijente SMAP Kovalima halo ona koordenasaun ho Prezidente autoridade munisípiu (PAM) Kovalima no hetan ona orientasaun atu halo koordenasaun mós ho autoridade postu administrativu sira oinsá atu rezolve.
Diretór ne’e mós fó hanoin ba públiku sira atu komprende tanba SMOP, Kovalima, la iha ekipamentu pezadu, maske iha tinan kotuk elobora iha PAA atu iha rasik ekipamentu pezadu maibé tanba orsamentu la to’o nune’e 2026 mós nafatin prevee orsamentu atu sosa.
“Atu responde ho emerjénsia ami presiza halo kontaktu ho IGE,I.P no ha’u mós manda ona dokumentu balun no sira hein dokumentu legál husi autoridade nune’e ami halo levantamentu hafoin dokumentu kompletu ami submete ba iha prezidente IGE atu orienta ba sub-brigada dezloka mai iha Kovalima”, nia dehan.
SMOP Kovalima mós identifika hela estrada pontuasaun ne’ebé mak aat grave hanesan iha parte Postu administrativu Fatumea husi postu Tilomar liga ba Fatumea iha Maubese grave no presiza atu rezolve hodi fasilita movimentu transporte sira.
Aleinde halo levantementu estrada iha postu Fatumea no Maukatar, kontinua mós ba postu sira hanesan Fohorem, ne’ebé mak atu identifika pontuasaun estrada ne’ebé mak aat grave no atu halo normalizasaun.
Jornalista:Celestina Teles
Editór: Rafael Ximenes de A. Belo
