DILI, 09 Maiu 2025 (TATOLI)—Vise Primeiru-Ministru no Ministru Koordenadór Asuntu Sosiál, Mariano Assanami Sabino, hateten fulan-Juñu tinan ne’e, Ministériu Saúde (MS) sei rekruta profisionál saúde hodi destaka bá fasilidade saúde iha Timor-Leste.
“Ami mós hanoin ona katak iha fulan-Juñu ne’e sei rekruta tan profisionál saúde sira, liuliu parteira sira atu kompleta fasilidade saúde iha Timor-Leste, tanba parteira ne’e mak hanesan brigada boot ida atu salva ema-nia vida,” Assanami informa bainhira partisipa serimónia Loron Mundiál Parteira, iha Salaun City8, Manleuana, Dili, sesta ne’e.
Nia dehan, parteira sira balun servisu kle’ur ona, maibé nafatin kontratadu, ida-ne’e ko’alia ho Ministra Saúde atu konsidera sasán sira-ne’e ho di’ak.
“Parteira balun servisu kle’ur ona, maibé nafatin kontratadu. Entaun, ha’u ko’alia ona ho Ministra Saúde no Vise-Ministru Saúde Asuntu Ospitalár mós hato’o hela ba, oinsá ita-boot sira túr hamutuk hodi konsidera buat sira-ne’e, tanba sira mak salva ema-nia moris” nia esplika.
Assanami husu ba joven sira-ne’ebé eskola kona-ba parteira bele tuir vaga ne’ebé mak Ministériu Saúde atu loke, tanba dalabarak sira eskola hotu, maibé servisu laiha, sira halo fali servisu seluk ne’ebé mak iha, entaun saida mak sira aprende iha eskola bele haluha.
Entretantu, Vise-Ministru Saúde Asuntu Ospitalár, Flávio Brandão Mendes de Araújo, rekoñese ho rekursu umanu ne’ebé sei menus fó impaktu boot ba mortalidade inan ho oan, tanba iha Postu Saúde ne’ebé iha área rurál seidauk prenxe ho parteira sira.
“Ita iha Postu Saúde hamutuk 300, iha-ne’ebé parteira foun sira prenxe 200-resin no Postu Saúde hamutuk 100-resin seidauk iha parteira. Seidauk prenxe mós nível Sentru Saúde. Ida-ne’e mak Governu hein hela oinsá mak halo rekrutamentu atu ita hasa’e númeru iha Postu Saúde no Sentru Saúde atu sira bele halo sira-nia papél,” nia afirma.
Jornalista: Felicidade Ximenes
Editór: Xisto Freitas da Piedade
