VIKEKE, 09 Maiu 2025 (TATOLI)—Estudante sira atu hetan kualidade edukasaun di’ak tenke haburas kultura lee barak hodi buka informasaun, referénsia, matenek liuhusi internet no livru sira atu hasa’e koñesimentu.
“Kualidade aprendizajen, ha’u rekoñese ita sei menus buat barak liuliu menus profesór, materiál prátika no bibleoteka. Tan ne’e, ha’u husu estudante Vikeke-oan tenke estuda makaas la’ós bá eskola de’it, maibé akompaña mídia sira hodi lee barak no lee sai kultura ida, atu estudante sira bele iha koñesementu luan,” Julio Sakadura hateten ba Agncia Tatoli iha salaun Tilou, Vikeke Vila, ohin.
Nia hatutan, bainhira ema realiza semináriu ruma ne’e estudante sira tenke ba partisipa hodi halibur informasaun, nune’e sai mós referénsia ba estudante sira.
“Ba estudante sira, liuhusi estuda barak mak ita bele dehan estudante iha kualidade no sai estudante kualifikadu. Estudante kualifikadu ne’e mak hatudu matenek iha ema barak nia leet,” nia hateten.
Baze fundamentu inportante tolu (3) mak sai importante ba estudante sira mak hanesan edukasaun informál, edukasuan naun formál no edukasaun formál.
“Ita-boot (estudante) simu tiha edukasaun husi família, autoridade, ba tán simu iha edukasaun no partisipa tan formasaun naun formal sira, entaun estudante sira sai matenek liuyán,” nia dehan.
Jornalista : Vitorino Lopes da Costa
Editór : Cancio Ximenes
