DILI, 09 Maiu 2025 (TATOLI)—Vise Primeiru-Ministru, Ministru Koordenadór Asuntu Sosiál, Dezenvolvimentu Rurál no Abitasaun, Mariano Assanami Sabino no Reprezentante Fundu Nasaun Unidade ba Labarik (UNICEF-sigla ingles) iha Timor-Leste, Patrizia Digiovanni, sesta ne’e, asina planu asaun konjunta atu rezolve má-nutrisaun iha Timor-Leste (TL).
Kolaborasaun ne’e atu válida kolaborasaun ne’ebé hala’o ona entre UNICEF ho departamentu oinoin iha Vise Primeiru-Ministru hanesan konsellu nasionál ba seguransa ai-han hanesan Konsellu Nasionál Seguransa Alimentár no Nutrisaun (CONSSAN-sigla portugés) no Unidade Misaun iha Kombate Stunting (UNMICS).
Vise Primeiru-Ministru, Mariano Assanami, hato’o nia agradesimentu ba UNICEF ne’ebé servisu hamutuk ho Governu iha apoiu ba sistema ne’ebé di’ak no fasilita programa prioridade sira ba Governu.
“Ohin ita marka momentu pivotál ida iha ita-nia luta hasoru má-nutrisaun infantil, asinatura planu asaun konjunta ida-ne’e ho UNICEF, la’ós prosesu formál de’it, maibé deklarasaun nasionál ida. Dokumentu ida-ne’e fó impulsu no akuntabilidade ba ita-nia esforsu sira. Ho lideransa UNMICS no CONSSAN TL iha liña oin, ita la’ós hadi’a de’it koordenasaun, maibé harii mós sistema governasaun ne’ebé bazeia ba evidénsia sustentável no informadu husi ita-nia komunidade nia lian no nesesidade,” Mariano Assanami dehan iha nia diskursu iha serimónia asinatura iha City8, Manleuana, Dili.
Vise-Ministru ne’e subliña katak presiza mós kooperasaun entre ministériu sira-ne’ebé iha ligasaun husi CONSAN TL hanesan Ministériu Obra Públika (MOP), Ministériu Agrikultura no Peska (MAP), Ministériu Saúde, Ministériu Negósiu Estranjeiru no Kooperasaun (MNEK) no seluk tan inklui UNMICS hodi kontribui iha implementasaun ninia programa sira ba prevensaun má-nutrisaun iha TL.
Iha fatin hanesan, Reprezentante UNICEF iha Timor-Leste, Patrizia Digiovanni, hateten UNICEF iha kompromisu atu halo prevensaun ba má-nutrisaun iha Timor-Leste no mantein seguransa alimentár nune’e labarik hotu iha Timor-Leste bele asesu ba nutrisaun ne’ebé di’ak.
“Ohin asina Planu Traballu Anuál ho Gabinete Vise-Primeiru-Ministru reafirma ita-nia kompromisu kompartilladu atu hakotu má-nutrisaun iha Timor-Leste. UNICEF sente orgullu hodi apoia UNMICS no CONSSAN TL hodi hadi’a governasaun nutrisaun, koordenasaun no envolvimentu komunidade no harii fundasaun ba futuru saudável ba labarik hotu-hotu iha Timor-Leste,” Patrizia Digiovanni esplika.
Nune’e, Diretór Ezekutivu Unit for Stunting Reduction or Unidade de Missão de Combate ao Stunting (UNMICS) iha Timor-Leste, Joel Maria Pereira, informa katak aleinde serimónia asinatura ne’e, iha mós workshop ne’ebé ko’alia kona-ba sensibilizasaun programa entre ministériu sira-ne’ebé iha relasaun.
“Kada ministériu ligadu tenke foka ba implementasaun planeamentu ne’e tuir atividade sira-ne’ebé iha planeamentu, nune’e bele prevene má-nutrisaun iha Timor-Leste,” Joel dehan.
Tuir dadus, 47% labarik sira ho idade tinan lima no menus stunting, iha impaktu signifikativu ba tempu naruk ba sira-nia saúde fízika no mentál, afeta sira-nia abilidade kognitiva no produtividade iha sira-nia moris tomak.
Jornalista: Felicidade Ximenes
Editór: Xisto Freitas da Piedade
