DILI, 09 Maiu 2025 (TATOLI) – Ministériu Administrasaun Estatál (MAE) liuhusi servisu Diresaun jerál desentralizasaun governasaun lokál tempu-badak sei sei anúnsiu fila fali prosesu rekrutamentu ba kandidatu foun Prezidente autoridade munisípiu (PAM) Dili hodi kontinua lidera servisu jestaun administrasaun iha kapitál Dili.
Servisu autoridade munisipál Dili daudaun ne’e lidera interinu husi Diretór Jerál Dezentralizasaun Governasaun Lokál, António Agosto Guterres, hodi subtitui PAM Dili, Grogório Saldanha ne’ebé rezigna aan husi kargu referidu iha loron 28 fulan-Janeiru tinan-2025.
Diretór Jerál Dezentralizasaun Governasaun Lokál, António Agosto Guterres, hateten, iha ona orientasaun husi Ministru Administrasaun Estatál, Tomas do Rosário Cabral, katak koordena ona asesór jurídiku sira para prepara Termu referénsia ida ba rekrutamentu hodi ba lidera Dili.
“Prosesu matadalan (Tor) ne’e aprova ona, hela de’it atu prepara tan buat seluk hodi ajusta nune’e iha tempu-badak ita bele pronúnsia ba públiku bele hetan kandidatu ne’ebé mak di’ak ba nomeasaun kompeténsia ne’e”, Diretór jerál ne’e informa.
Dirijente governasaun lokál ne’e hateten, sira fasilita prosesu no aprezenta ba Ministériu Administrasaun Estatál mak sei aprezenta fali sub-proposta ne’e ba Konsellu-ministru mak sei deside hodi hili kandidatu loloos hodi lidera autoridade munisipál Dili ba futuru.
“Atu hetan autoridade ne’ebé bele lidera AMD ba futuru nia mós tenke iha koñesimentu lideransa ne’ebé di’ak no kualifikadu ho termu kualidade profisionál no intendimentu di’ak ba polítika dezentralizasaun administrativa institusionál hodi halo preparativu bazeia ba rezolusaun Governu”, autoridade ne’e hatutan.
Tanba, tuir nia, iha tinan-2026 mós sei iha hela preparasaun ba avaliasaun kondisaun mínimu, entaun ema hirak-ne’ebé sira buka atu tau hanesan autoridade munisipál Dili ema ne’ebé iha duni kompeténsia administrativu, finanseiru, patromoniál no konesimentu di’ak ba administrasaun públika.
“Tanba Dili komplexidade, kuaze entidade oioin mak konsentra iha ne’e hanesan Estadu no sosiedade sívil. Entaun, ema-ne’ebé atu lidera Dili ne’e tenke hakuak ema hotu, pasiénsia rona ema seluk, tenke maduru, iha rigór no firme ba desizaun bazeia ba pozisaun hanesan autoridade”, nia énfaze.
Iha sorin seluk, tuir Ministru Administrasaun Estatál, Tomas do Rosário Cabral, prosesu rekrutamentu PAM foun ne’e la’o hela maibé buat barak mak tenke haree iha jestaun administrasaun antes atu ba prosesu. “Entaun ida-ne’e diresaun jerál dezentralizasaun mak hatene kona-ba ne’e tanba ha’u despasu tiha ona”.
“Hafoin komemorasaun loron restaurasaun independénsia hotu ita tenke haree ba asuntu ne’e, tanba kapitál Dili ne’e boot no akumula ema hamutuk 3.35 mil populasaun ne’e jestaun ba Dili ne’e tenke kuidadu no ne’e ulun fatuk moras”, Ministru ne’e reforsa.
Jornalista: Alexandra da Costa
Editór: Rafael Ximenes de A. Belo
