OEKUSI, 09 Maiu 2025 (TATOLI) – Ministru Justisa (MJ), Sérgio Hornai, kinta ne’e, hala’o enkontru kortejia ho Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago de Fátima Lobato, hodi deskuti asuntu importante tolu kona-ba fortalesimentu institusionál atu mellora servisu ba setór justisa iha Oekusi.
Hafoin ramata importante tolu ne’e, Sérgio Hornai ba jornalista sira, informa katak sorumutu ne’e ko’alia kona asuntu setór justisa nian, tanba Oekusi ejiste mós tribunál primeira instánsia, prokuradór repúblika, defensór públika advogadu, polísia investigasaun kriminál, notariádu no mós instituisaun relevante ba setór justisa nian
“Ne’ebé ami troka hanoin oinsa, entre Governu Sentrál iha setór justisa nian atu halo desizaun polítika ba iha fortalesimentu dezenvolvimentu institusionál ne’e, integradu ba iha polítika setór justisa, ne’ebé Governu Sentrál halo hela esforsa atubele halo alinasaun,” dehan Sérgio Hornai, iha Oekusi, ohin.
Maibé nia dehan, iha enkontru ne’e mós atu haree kona-ba autonómia administrativu finanseiru iha RAEOA nian, atu halo jestaun ida oinsa mak atubele fó apoia, nune’e funsionamentu institusionál ne’e bele la’o ho di’ak ba iha direitu propriedade, prosesu julgamentu sira, labele iha impedimentu, nune’e mós karik iha rejistu sivíl nian kona-ba sidadaun sira atu hetan emisaun billete identidade no seluktan.
Biban ne’e mós deskute kona-ba konseitu oinsa halo kampaña dezaminasaun informasaun sira komunidade no entidade relevante sira, nune’e bele hases-an husi prátika krime sira, tantu iha kontra-bandu no mós krime ilisitu sira seluks.
Iha fatin hanesan, Prezidente Autoridade RAEOA, Rogério Tiago Lobato, promete sei fó apoia ba setór justisa, nune’e bele bele mellora di’akliutan atendimentu ho indepentimente.
“Ohin nia (Ministru) koordena ho RAEOA, oinsa mak bele halo servisu justisa ne’e la’o di’ak, ita iha buat barak presiza halo, maibé tenki hasoru malu ho tribunál, ministériu públiku, la’os atu interfere sira-nia servisu, maibé oinsa bele tulun sira atu halo sira-nia servisu ne’e ho indepensia di’akliu tan,” nia dehan.
Jornalista: Abílio Elo Nini
Editor: Florencio Miranda Ximenes
