KOVALIMA, 09 Maiu 2025 (TATOLI) – Komemora loron mundiál livru, Sekretáriu Estadu Dezenvolvimentu Lokál, Mateus dos Santos Tallo distribui livru ‘Ha’u-nia tasi. ha’u-nia Timor’ ba alunu sira iha Eskola bázika sentrál (EBC) Suai Loro, Postu administrativu Suai, munisípiu Kovalima.
Sekretáriu Estadu Dezenvolvimentu Lokál, Mateus dos Santos Tallo, dehan, iha ámbitu komemorasaun loron mundiál livru ne’e, nia halo teste ba alunu sira nune’e nia mós nota katak alunu barak ladun ativu atu lee livru.
“Ita husik mensajen hodi haree alunu barak mak ladun ativu lee livru. Ho loron mundiál livru, ho ha’u-nia prezensa husik mensajen atu enkoraja alunu ativa lee livru iha biblioteka” Governante, Mateus dos Santos Tallo dehan ba jornalista sira hafoin komemora eventu mundiál ne’e iha EBC Suai Loro, ohin.
Governante mós fó hanoin ba alunu sira katak presiza lee livru maka’as, matéria sira hanesan matemátika, siénsia naturál no siénsia sosiál no materiál bázika profesór fó ba sira liliu ho livru ne’ebé iha, presiza estuda maka’as no lee barak.
Realizasaun atividade iha ámbitu komemorasaun loron mundiál livru ne’e, bazeia ba desizaun husi Konsellu-ministru katak membru governu idaidak dezloka ba nia munisípiu sira atu husik mensajen ba alunu sira iha munisípiu.
“Ita komemora loron mundiál ba livru, loron 09 maiu hanesan loron mundiál ba livru, bazeia ba desizaun husi Konsellu-ministru; deside membru Governu hotu ba nia munisípiu. Ohin membru Governu tolu mak mai iha Kovalima hanesan Vise-ministru obra públika no Vise-ministru justisa no ha’u rasik”, nia dehan.
Iha atividade komemorasaun loron mundiál livru ne’e, Sekretáriu Estadu mós distribui livru ho tema ‘Ha’u-nia tasi. Ha’u-nia Timor’ ba alunu sira iha EBC Suai Loro.
“Ami dezloka mai iha Kovalima, eskola EBC Suai Loro, fahe livru no mós husik mensajen ba ita-nia oan sira hahú sira-nia estudu pre-eskolár to’o sestu ano. Ami distribui livru kona-ba ‘Ha’u nia-tasi. Ha’u-nia Timor”, nia informa.
Atividade distribuisaun livru ne’e hodi konta istória nune’e alunu sira bele hatene no ba futuru alunu sira bele asegura tasi mós hanesan iha Suai Loro presiza mós prezerva tasi moos bele iha ambiente furak iha tasi.
“Bazeia ba observasaun alunu sira bele kapta bainhira ko’alia ho alunu sira ha’u mós koko ho komemorasaun loron mundiál ba livru ne’e eskola iha biblioteka maske nia kondisaun ladun di’ak atu lee livru”, nia hateten.
Iha sorin seluk, Diretór EBC Suai Loro, Fernando António espresa sentimentu kontente tanba ho prezensa sekretáriu Estadu Dezenvolvimentu Lokál hodi enkoraja alunu sira atu lee livru iha biblioteka.
“Ha’u haree atividade ba loron ohin kontente hodi fó hanoin ba alunu sira atu ativu lee livru iha biblioteka tanba ohin bazeia ba observasaun husi SEDL balun ativu lee no balun la lee”, nia haktuir.
Tuir dadus alunu iha EBC Suai Loro hamutuk 700-resin ho totál nia profesór hamutuk 32.
Jornalista:Celestina Teles
Editór: Rafael Ximenes de A. Belo
