KOVALIMA, 12 Maiu 2025 (TATOLI) –Asosisaun Ema ho Defisiènsia iha Timor-Leste hamutuk ho Organizasaun Klibur Dezenvolvimentu Sustentavél Timor-oan (KDESTO) partilla esperiénsia oinsá integra Ema ho Defisiénsia (EhD) iha nível lokál ba lideransa komunitária suku ho nia estrutura.
“Ami-nia atividade sosializasaun ida-ne’e ba xefe suku neen ho nia estrutura oinsá atu intrega ema ho defisiénsia atu aumenta partisipasaun EhD iha nível lokál”, Koordenadór Programa Abentinos Maria dehan ba TATOLI, iha salaun STAE Kovalima, ohin.
Atividade sosializasaun ida-ne’e atu fó hanoin ba lideransa suku ho nia estrutura bainhira realiza atividade sira iha suku bele integra EhD sira.
Xefe programa ne’e dehan, atu integra EhD haree uluk mak asesibilidade hanesan rampa, tradutora lian jestuál no fasilita EhD matan letra brayler, maibé haree ida-ne’e seidauk másimu “Atu garante partisipasaun EhD ba dahuluk ita ko’alia asesibilidade maibé fizikamente iha sede suku balun konstrui ona rampa hodi fasilita EhD”, nia dehan.
Diretór KDESTO Alfredo dos Santos reforsa katak prezensa organizasaun KDESTO atu haree asuntu no trata EhD ho sidadaun sira seluk.
“Atividade ida-ne’e ita foku ba xefe suku ho objetivu prinsipál atu haree hanesan EhD iha ita-boot sira-nia fatin. Programa ne’ebé ohin ita halo ADTL servisu hamutuk ho KDESTO hodi partilla informasaun kona-ba direitu partisipasaun síviku adolesente no joven ho defisiénsia”, nia dehan.
Reprezentante Prezidente Autoridade Munisípiu Kovalima, Sergio Moniz da Cunha konsidera katak mundu daudaun ne’e tau interrese aas liu nune’e labele husik ema ida iha kotuk hodi fó oportunidade makaas ba feto vulneravel oan-ki’ak no EhD sira.
“Dala ruma ita la komprende direitu partisipasaun síviku. Nune’e , ha’u louva ba formadór sira atu partilla informasaun kona-ba direitu partisipasaun síviku adolesente no joven ho defisiénsia ba lideransa komunitária ho nia estrutura sira,” nia apresia.
Ho partilla informasaun ida-ne’e, tuir nia, oinsá atu hasa’e lideransa komunitária sira-nia koñesenentu no sira bele kontinua hatutan informasaun iha baze.
Autoridade suku ne’ebé mak partisipa iha atividade ne’e mai husi suku sira hanesan suku Matai, Ogues, Labarai, Kamenasa Suai Loro no suku Beko.
Jornalista:Celestina Teles
Editór: Rafael Ximenes de A. Belo
