KOVALIMA, 11 Maiu 2025 (TATOLI) – Vigário Jerál dioseze Maliana, Padre Lucio Noberto de Deus hamutuk ho Prezidente Autoridade Munisípiu (PAM) Kovalima, Miguel Armada Cardoso inaugura kapela São Miguel Arcanjo, iha Suku Suai Loro, Postu administrativu Suai, Munisípiu Kovalima.
Vigário Jerál Dioseze Maliana, Padre Lucio Noberto de Deus dehan, kapela hanesan uma orasaun nu’udar meiu atu sarani sira hasoru malu beibeik, nu’udar meiu atu hafanun nafatin sarani no hamoris sarani nia konsiénsia katak Maromak halibur nafatin sarani tanba kapela fatin ne’ebé atu rona Kristu nia liafuan.
“Seremónia inaugurasaun kapela hanesan momentu importante ba sarani Suai Loro, hodi sente unidade ba sarani iha Suai Loro no unidade ho paróku, ita hotu nia unidade nu’udar sarani dioseze Maliana no sente ita-nia unidade iha igreja universál hamutuk ho Papa foun”, Padre Lucio Noberto de Deus haklaken iha nia omilia bainhira prezide misa, iha kapela Suai Loro domingu ne’e.
Bazeia ba akompañamentu jornalista TATOLI ba plataforma Youtube haree katak sarani sira entuziasmu partisipa iha misa referida, iha ámbitu lansamentu kapela ne’e hanesan mós iha tempu Páskua.
Uma ida-ne’e sai nu’udar símbolu igreja iha sarani idaidak nia moris no iha fuan, kapela labele akumula sarani hotu atu tuur nia hatudu nia moris nia fuan, sensibilidade kona-ba fiar ba Maromak símbolu halibur sarani unidade, hodi tau laran metin ba Maromak no sente Maromak nia domin.
“Importante hanesan sarani nu’udar sensibilidade hanesan ema sarani makaas. Inaugura kapela hanesan fatin orasaun ba sarani sira atu haboot ita-nia fiar, sensibilidade, sentimentu unidade iha kapela no ho igreja universál”, nia fó hanoin.
Na’i-lulik ne’e dehan, Kapela ne’ebé furak la mosu mai de’it maibé tanba sarani sira-nia unidade no esforsu konsege konstrui kapela São Miguel Arcanjo Suai Loro tanba ne’e tenke hakbesik aan ba Maromak no tenke kuida kapela.
Iha sorin seluk, Prezidente Autoridade Munisípiu Kovalima, Miguel Armada Cardoso, agradese komisaun organizadora hodi konstrui kapela São Miguel Arcanjo iha Suai Loro.
“Ha’u hato’o agradese ba komisaun organizadora no Padre Vigáriu Dioseze Maliana hodi inaugura kapela iha Suai Loro. Ema hotu nia hanoin bele konstrui kapela, bele tau fiar atu hakbesik ba kapela atu kuda fiar ba Katólika nian bele eduka oan no sarani sira,” nia dehan.
Autoridade Kovalima fó hanoin ba sarani sira tuir fiar ne’ebé iha, atu hametin servisu hamutuk hodi kuida kapela ho di’ak.
Xefe Komisaun Organizadora Manuel Gomes da Costa, esplika, Sarani Suai Loro forma komisaun organizadora hodi hala’o seremónia inaugurasaun ba kapela tanba kontribuisaun osan husi funsionáriu, grupu barak – sarani sira husi grupu orasaun 13, sarani Suai Loro iha Dili no sarani sira seluk hamutuk $ 7,862.50
Orsamentu ne’ebé mak komisaun orgamizadora rekolla,$ 7,862.50 husi orsamentu aloka ba kada seksaun hodi halo preparasaun hodi aloka ba atividade hamutuk $ 6,537.
“Ha’u hato’o agradese ba komunidade hotu hodi fó apoiu hodi dinamiza konstrusaun hodi hala’o serimònia inaugurasaun”, nia relata.
Kapela São Miguel Arcanjo Suai Loro ho nia medida 24×16, hahú konstrui iha loron 06 Novembru 2023 ne’ebé hala’o inaugurasaun iha loron 11 Abríl tinan ne’e.
Orsamentu konstrusaun ba Kapela São Miguel Arcanjo Suai loro hamutuk rihun $ 33,9-resin hosi orsamentu osan rihun sia apoiu husi Gabimete apoiu Sosiedade sívil no rihun $ 33 kontribuisaun mai hosi sarani sira.
Jornalista:Celestina Teles
Editór: Rafael Ximenes de A. Belo
