Kazu oho karau iha Bauro, PNTL Lautein aprezenta ona ba MP

DILI, 12 Maiu 2025 (TATOLI) – Komandante Polísia Nasionál Timor-Leste (PNTL), munisípiu Lautein, Superintendente Polísia João da Costa, hateten kazu oho no hakanek karau iha suku Bauro, postu administrativu Lospalos, munisípiu Lautein, aprezenta ona ba Ministériu Públiku (MP).

João da Costa hateten kazu ne’e akontese iha semana kotuk no parte vítima hato’o ona keixa no Polísia no halo ona investigasaun ba suspeitu no tuir konkordánsia parte rua ne’e hakarak lori bá Ministériu Públiku no tribunál.

“Ami-nia serbisu finalidade la’o tuir konkordánsia husi parte rua, ne’ebé iha atu ba Ministériu Públika ka tribunál. Ami entrega ona kazu ne’e ba Ministériu Públiku, ne’ebé depende vítima ho suspeitu, to’o iha ne’ebá hakarak dada ka halo oinsá depende sira”, João da Costa dehan ba Tatoli via telefone, ohin.

Iha sorin seluk, Xefe Suku Bauro, Postu Administrativu Lospalos, Florindo Miranda, hateten kazu oho karau ne’e akontese iha loron 06 Maiu 2025, iha sub-aldeia Motara, suku Bauro, no vítima hato’o kedan keixa. Iha 07 Maiu, Polísia bá bolu kedas suspeitu no detein iha sela durante oras 24 hafoin mak halo investigasaun.

Nia relata katak bainhira Polísia sira bá kaer suspeitu, hanesan líder komunitáriu, nia parte ho delegadu sira tuir bá eskuadra Polísia Lospalos no bolu vítima no suspeitu hodi husu atu halo mediasaun hodi rezolve tuir família, maibé parte vítima lakohi no hakarak levanta ba oin.

Na’in ba karau Ángela Lopes hateten situasaun ne’e la’ós foin akontese, maibé dezde tinan 2023.

Nia haktuir katak karau ne’ebé suspeitu sira oho la’ós fuik, maibé husik hela iha uma kotuk mak sira duni bá dook mak oho.

Tuir nia, karau ne’ebé sira duni hamutuk haat, ida oho ona, rua halo kanek todan no ida lakon to’o agora seidauk hetan.

“Situasaun sira ne’e suspeitu sira halo beibeik ona, entaun ami hakarak levanta ba oin to’o tribunál, nune’e futuru labele akontese tan”, nia afirma.

Jornalista: Arminda Fonseca

Editora: Maria Auxiliadora