DILI, 09 Maiu 2025 (TATOLI)—Komandu Polísia Nasionál Timor-Leste (PNTL) halo promosaun diviza tranzitória ba membru husi Unidade Polísia Marítima (UPM) na’in-132.
Promosaun diviza tranzitória ne’e nu’udár polítika IX Governu Konstitusionál liuhusi Ministériu Interiór atu dignifika servisu polísia sira.
Membru UPM hirak ne’ebé hetan promosaun tranzitória mak husi Postu Inspetór Xefe Polísia ba Postu Superintendente Asistente Polísia, husi Postu Inspetúr Polísia promovidu ba Inspetór Xefe Polísia, husi Postu Inspetór Asistente Polísia promove ba Postu Inspetór Polísia.
Enkuantu, husi Postu Sarjentu Xefe promovidu ba Inspetór Asistente, husi Sarjentu promove ba Sarjentu Xefe, husi Primeiru Sarjentu promove ba Sarjentu, hosi Postu Ajente Xefe promove ba Primeiru Sarjentu, husi Ajente Prinsipál promove ba Ajente Xefe no ikus Postu Ajente promove ba Ajente Prinsipál.
Komandante Unidade Polísia Marítima (UPM), Superintendente Polísia Eugénio Pereira, hateten, impozisaun diviza ba membru Unidade Polísia Marítima 132 nu’udár polítika Ministériu Interiór nian atu dignifika servisu membru polísia sira liuhusi sira-nia abnegasaun durante ne’e.
“Ita hahú ona iha 27 Marsu foin lalais ne’e no ohin ita kontinua de’it ba promosaun ne’e,” Eugénio hateten iha nia intervensaun durante seremónia promosaun diviza ba membru Unidade Polísia Marítima na’in-132, iha Seonál, Dili, sesta ne’e.
Nia dehan, promosaun diviza ne’e nu’udár parte ida atu motiva liután membru sira hodi kontinua serbí institusaun.
“Maibé, ami husu ba Governu atu kontinua tau-matan ba PNTL liuliu Infraestrutura no ekipamentu Unidade Polísia Marítima, nune’e halo servisu kontrolu tasi tuir lei orgánika PNTL,” Eugénio sujere.
Iha fatin hanesan, Komandante Jerál PNTL Interinu, Komisáriu Polísia Pedro Belo iha ninia intervensaun hateten promosaun diviza ne’e signifika aumenta diviza, aumenta mós responsablidade no konfiansa ba iha komunidade.
“Hetan promosaun katak atu kontinua servisu ho profisionalizmu hodi hala’o kna’ar tuir lei no orden, tanba ne’e parabéns ba membru UPM sira-ne’ebé hetan promosaun atu kontinua hatudu servisu di’ak,” nia enkoraja.
Entretantu, Vise Primeiru-Ministruu, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, hateten PNTL hanesan instituisaun ida-ne’ebé iha misaun sagradu hodi garante seguransa rai ne’ebé ema barak mate hodi hetan independénsia.
“Polísia Nasionál Timor-Leste nu’udár instituisaun ne’ebé halo misaun sagrada ba rai no povu ida-ne’e. Tan ne’e, ha’u husu atu imi kontinua servisu ho profisionál liuhusi imi-nia situasaun. Husu ba PNTL atu serbí besik liután no sai duni protetór hodi proteje ita-nia povu, serbí lei no orden,” nia afirma.
Jornalista: Natalino Costa
Editór: Xisto Freitas da Piedade
