BAUKAU, 12 Maiu 2025 (TATOLI)–Membru Polísia Nasionál Timor-Leste (PNTL) hamutuk na’in-175 liuhosi serimónia impozisaun hetan promovidu diviza iha Komandu Polísia Munisípiu Baukau.
Komandante Jerál PNTL Interinu, Komisáriu Polísia Pedro Belo, hateten loron ohin konsideradu importante ba Komandu PNTL Munisípiu Baukau tanba konsege realiza serimónia impozisaun diviza membru sira-ne’ebé durente ne’e dedika aan tinan barak hodi fó hanoin nu’udár ponte inspiradór liuliu hametin étika serbisu iha PNTL.
“Membru idak-idak presiza serbisu di’ak liután, iha vontade atu halo serbisu no dedikasaun tomak tanba promosaun ida-ne’e la’ós hanesan prémiu maibé kumpri ona rekizitu inklui kritéria Estatutu PNTL,” Pedro Belo hateten iha Komandu PNTL Munisípiu Baukau, Vila Nova, segunda ne’e.
Komisáriu Polísia Pedro Belo argumenta, Governu rekoñese PNTL nia dedikasaun bazeia ba kna’ar no responsabilidade ne’ebé durante ne’e hein tinan barak hodi hein ho pasiénsia nune’e bele realiza promosaun transzitória ba membru PNTL iha Baukau.
Nia husu ba membru sira atu kontinua mantein responsabilidade, disiplina no kontinua aprende siénsia polísia nune’e bele hasa’e kapasidade lideransa liuliu dedika aan nafatin ba Estadu, povu no inkluindu iha partidu polítiku, grupu arté marsiál inklui arté rituál.
“Promosaun transzitória ida-ne’e nu’udár rekoñesimentu ba kada membru PNTL ne’ebé fó ona ninia dedikasaun, demonstra profisionálizmu hodi prezerva pás no orden,” Komisáriu Polísia Pedro Belo subliña.
Desizaun promove diviza membru PNTL bazeia ba Rejime Transzitóriu no tuir antiguidade ne’ebé define iha Estatutu PNTL, aprova husi Dekretu-lei númeru 35/2024, loron 18 Outubru.
Aleinde ne’e, bazeia ba despaxu governu liuhusi Ministériu Interiór (MI) numéru 14/G-MI/III/2025 kona-ba Promosaun Transzitória PNTL no despaxu Komandu PNTL númeru 239/CG-PNTL/ IV/2025 kona-ba Promosaun Postu Ajente Prinsipál no Ajente Prinsipál ba Ajente Xefe.
Entretantu, seremónia promosaun ba membru 175 referidu, prezide husi Inspetór Serimónia atuál Ministru Planeamentu no Investimentu Estratéjiku, Gastão de Sousa, iha-ne’ebé promove Postu Superintendente Asistente hamutuk na’in-haat, Inspetór Xefe na’in-13, Inspetór 15, Inspetór Asistente 48, Sarjentu Xefe 37, Primeiru Sarjentu 35, Ajente Xefe na’in-sia no Postu Ajente Prinsipál hamutuk na’in-14.
Jornalista: Natalino Belo
Editór: Xisto Freitas da Piedade
