DILI, 12 Maiu 2025 (TATOLI) – Parlamentu Nasionál (PN) liuhusi reuniaun plenária, segunda ne’e, autoriza Prezidente Repúblika (PR), José Ramos Horta, hodi hala’o vizita ofisiál bá Singapura.
Prezidente Parlamentu Nasionál, Maria Fernanda Lay, hatene rezultadu votasaun a favór 37, kontra 10 no abstensaun haat, nune’e Prezidente hetan autorizasaun atu dezloka bá Singapura.
Tuir termu previstu husi númeru 1 iha atigu 80 no alínea h, númeru 3, artigu 95 Konstituisaun, ho meiu ne’e PR solisita ba PN konsentimentu préviu ba dezlokasaun ofisiál bá Singapura hodi resposta ba konvite husi Xefe Ezekutivu Institutu Internasionál Estudu Estratéjiku, hodi partisipa diálogu Shangri-La, ba da-20 husi institutu ne’e. Diálogu ne’ebé sei realiza iha 30 Maiu to’o 01 Juñu 2025, iha Singapura.
Dezde 2002, diálogu Shangri-La nu’udar fórum seguransa importante iha Ázia, nu’udar plataforma fundamentál hodi debate no rezolve dezafiu rejionál.
Diálogu tinan ne’e ho nia kontestu iha Seguransa Ázia Pasífika ne’ebé sei partisipa mós husi Prezidente Repúblika Fransa, Emmanuel Macron, ne’ebé sei halo diskursu abertura iha 30 Maiu.
International Institute for Strategic Studies (IISS) Shangri-La Dialogue mak enkontru úniku iha ne’ebé ministru sira debate dazafiu seguransa urjente iha rejiaun, partisipa enkontru bilaterál no dezenvolve abordajen foun hamutuk.
Nune’e, Prezidente Repúblika sei auzente iha Timor-Leste entre 29 no 02 Juñu 2025.
Jornalista: Nelson de Sousa
Editora: Maria Auxiliadora
