BAUKAU, 12 Maiu 2025 (TATOLI)–Suspeitu ho inisiál SdC ne’ebé deskonfia rasta Pároku Parókia Santa Terezinha Kelikai, Pe. David Savio, detein ona iha sela komandante Polísia Nasionál Timor-Leste (PNTL) Munisípiu Baukau.
Tuir kronolojia, kazu referidu akontese iha segunda ne’e purvolta tuku 09:00 Otl, bainhira suspeitu SdC to’o iha kartóriu atu konfirma sertidaun batizmu maibé mosu diskusaun ho Pároku tanba konsidera prosesu tratamentu dokumentu iha Parókia Kelikai lentu demais.
Vítima tenik, antes ne’e, nia esplika ona relasiona prosesu trata sertidaun lentu tanba kauza funsionáriu ba asuntu ne’e ho kondisaun moras no Konsellu Parókia seidauk deside atu halo substitusaun.
“Nia ameasa atu baku. Laiha agresaun fízika maibé nia rasta ha’u-nia kamiza lees hotu, maibé ha’u-nia kondisaun di’ak de’it,” Padre informa ba TATOLI liuhosi telefónema, segunda ne’e.
Nia haktuir, suspeitu husu razaun relasiona ho prosesu administrasaun sertidaun, nune’e la simu realidade hodi hamosu dezentendimentu iha kartóriu igreja.
Padre David hatutan, hafoin akontesimentu, suspeitu hakne’ak hodi hato’o deskulpa maibé iha tempu hanesan parte seguransa to’o kedas iha fatin akontesimentu hodi asegura suspeitu ba Eskuadra PNTL Kelikai antes transporta hodi detein iha sela Komandu PNTL Munisípiu Baukau.
“Hau-nia sentimentu triste uitoan tanba nia la komprende kona-ba buat ne’ebé ha’u esplika,” Padre lamenta.
Entretantu, TATOLI koko atu konfirma kazu ne’e ba PNTL Baukau maibé seidauk bele fó komentáriu. Maski nune’e, husi observasaun iha terrenu hatudu suspeitu detidu ona iha sela hodi hein prosesu investigasaun husi parte PNTL.
Jornalista: Natalino Belo
Editór: Xisto Freitas da Piedade
