DILI, 13 Maiu 2025 (TATOLI)–Diretór Kontrolu Kualidade Institutu Nasionál Farmaséutiku no Produtu Médiku (INFPM), Miguel Soares, hateten INFPM transfere ona fundu ho valór rihun $107 ba Fundu Nasaun Unida ba Labarik (UNICEF-sigla inglés) hodi sosa vasina rotavirus no Difteri Tetanus (DT).
“Foin lalais ne’e INFPM transfere ona fundu hamutuk rihun $107 ba konta UNICEF nian hodi sosa vasina rotavirus no Difteria Tetanus,” Miguel Soares dehan iha Kampung Alor, Dili, segunda ne’e.
Nia esplika, sasán vasina rua ne’e laiha ona dezde Janeiru 2025 to’o agora, tan ne’e INFPM fó konfiansa ba UNICEF atu sosa.
“Ita-nia prosesu kompra hotu-hotu fó konfiansa ba UNICEF. Ami fó fiar ho razaun, prosesu sosa ne’e sensível tebes husi sasán sira seluk. UNICEF hanesan ajente ofisiál ONU nian ne’ebé durante ne’e hetan konfiansa husi Organizasaun Mundiál Saúde (OMS) hodi sosa vasina,” nia hateten.
Aleinde ne’e, nia hatutan, to’o agora INFPM ho UNICEF mós kolabora ona sosa ai-moruk ne’ebé di’ak tebes.
“Sosa vasina liuhusi UNICEF ho folin ne’ebé baratu tebes, duké sosa diretamente ita seidauk bele,” Miguel dehan.
Jornalista: Felicidade Ximenes
Editór: Xisto Freitas da Piedade
