Jurista Sergio Quintas la dúvida kapasidade Prokuradór Nelson de Carvalho

DILI, 13 Maiu 2025 (TATOLI)—Jurista Sergio Quintas la dúvida ho kapasidade Prokuradór Nelson de Carvalho ne’ebé hetan fiar husi Prezidente Repúblika, José Ramos Horta, sai Prokuradór Jerál Repúblika (PJR).

Nia konsidera Prokuradór Nelson nu’udár Majistradu Ministériu Públiku ho primeira klase no molok hetan fiar ba lidera PJR, nia nu’udár adjuntu ba PJR atuál, tanba ne’e Prokuradór Nelson iha kapasidade lidera PJR.

“Tanba ne’e, ha’u la dúvida ninia kapasidade. Nia prenxe rekizitu,” Jurista Sergio Dias Quintas hateten ba jornalista sira iha Tribunál Judisiál Primeira Instánsia Dili, Kaikoli, tersa ne’e.

Jurista ne’e espera katak ho nomeasaun Prokuradór Jerál Repúblika, Nelson de Carvalho, durante nia mandatu tinan haat bele dezenvolve Instituisaun Ministériu Públika liuliu Prokuradoria Jerál Repúblika bele halo servisu di’ak liután no livre.

Notísia relevante: PR Horta nomea Prokuradór Nelson de Carvalho asumi kargu PJR

“Hein katak iha ninia mandatu bele aumenta númeru prokuradór, formasaun ka kapasitasaun ba ajente Ministériu Públiku tenke kontinua la’o,” nia afirma.

Sergio esplika, Ministériu Públiku ne’e na’in ba asaun penál, defende legalidade no salva osan Estadu, tan ne’e labele defende interese grupu nian.

Nia enkoraja PJR Nelson Carvalho tenke brani investiga ema sira-ne’ebé pratika korupsaun liuliu governante sira kaer ukun ne’e.

Biografia

PJR Nelson de Carvalho, moris iha Dili, 25 Janeiru 1969, Estadu Sivíl kabe-na’in ho nasionalidade timoroan no rezidénsia atuál iha Aldeia 03, Suku Maskareñas, Postu Administrativu Vera-Krúz, Munisípiu Dili.

Ninia formasaun akadémika hahú nia Primária iha SD Negeri I Dili, iha tinan 1979 no ramata iha tinan 1984, nune’e kontinua nia Pre-Sekundária iha SMP Negeri I Dili, iha tinan 1984 to’o tinan 1987, nune’e kontinua iha tinan 1987, tama Sekundária iha eskola SMA Negeri II Dili no ramata iha tinan 1990. Hafoin termina tiha ne’e, PJR Nelson kontinua nia estudu lisensiatura iha Fakuldade Direitu iha Universidade 17 Agustus (UNTAG) Surabaya, iha tinan 1993 to’o tinan 1998.

Durante iha tinan-2000, Nelson hahú envolve iha Formasaun Profisionál sira hanesan:

Iha tinan 2000, tuir formasaun ba Kandidatu Majistradu no Defensór Públiku, iha Darwin, Austrália, Durante semana rua;
Formasaun estudu komparativu iha Sentru Formasaun Judisiáriu Lisboa, Portugal, durante fulan rua, iha tinan 2000;
Formasaun rekizitu notariadu husi Ministériu Justisa, iha Sentru Formasaun Judisiáriu, durante loron 77 (hitunulu-resin-hitu) iha tinan 2007;
Formasaun ba Majistradu no Defensoria Públika, iha Sentru Formasaun Jurídika no Judisiária, Dili, hahú husi fulan-Agostu, tinan 2008 to’o fulan-Abríl, tinan-2011;
5⁰ kursu formasaun ba investigasaun nivél 1⁰ iha Akademia Polísia Komoro, Dili, iha loron 23, fulan-Janeiru to’o fulan-Abríl, tinan 2012;
Formasaun “Basic Trial Advocacy Training’’, iha Otél Ramelau-Dili, Loron 18 to’o loron 22, fulan-Marsu, tinan-2013, no organiza husi the United States Departament of Justice Office of Overseas Prosecutorial Development, Assistance and Training(OPDAT);
Formasaun “Counter Narcotics Training’’, iha Otél Ramelau-Dili, iha loron 21 to’o Loron 23, fulan-Agostu, tinan-2013, organiza husi The United States Departament of Justice Office of Overseas Prosecutorial Development, Assistance and Training (OPDAT);
Formasaun kona-ba “Criminal Financial Investigation-tracking, seizure and recovery of financial assest from criminal origin’’ iha Otél Plaza-Dili, iha loron 26 to’o 30, fulan- Outubru, tinan-2015, entre Ministériu Públiku Timor-Leste ho Financial Transaction Reports And Analysis Center (PPATK-Indonezia);
Formasaun kona-ba “Anti-Corruption and Financial Investigations: Money Laundering and Asset Forfeiture, iha Tower Fatuhada, Dili, loron 13-15, fulan-Maiu, tinan- 2019, ne’ebé organiza husi The United States Departament of Justice ofice of Overseas Prosecutorial Development, Assistance and Training (OPDAT); no
Formasaun kona-ba “Building Task Forces and Succesfull Proactive investigation” iha Tower Fatuhada, Dili, loron-15-18, fulan-Jullu, tinan 2019, organiza husi The United States Departament of Justice office of Overseas Prosecutorial Development, Assistance and Training (OPDAT);
Nune’e mós iha loron-15-26, fulan-Agostu, tinan-2019, Nelson reprezenta Ministériu Públiku hodi tuir estudu komparativu ka Study tour for Timor-Leste judges and Prosecutors iha Tennessee-Knoxville (USA) ne’ebé mak organiza husi The United States Departament of Justice ofice of Overseas Prosecutorial Development, Assistance and Training (OPDAT).

Aleinde formasaun sira, Dr. Nelson de Carvalho mós partisipa iha Workshop no Konferénsia Lokál tantu Internasionál sira mak hanesan:

Partisipa Workshop on Economic Financial Crime, iha Dili, loron 23 to’o loron 25, fulan-Outubru, tinan 2016, ne’ebé organiza husi UNODC;
Partisipa iha Regional Conference on Fast-Tracking the Implementation of UNCAC, iha Bangkok, Thailándia, loron 31, fulan-Janeiru to’o loron 3, fulan-Fevereiru, tinan 2017;
Partisipa Konferénsia 43^rd IAP Executive Committee Meeting, 10^thAsia & pacific Rejionál Conferénsia, iha Busan, Korea, iha loron 3-7, fulan-Abríl, tinan 2017;
Partisipa iha Anuál General Meeting, kona-ba Asset Recovery Interagency Network Asia Pacific, iha Bali-Indonézia, iha loron 5-6, fulan-Novembru, tinan 2018; no
Partisipa iha Workshop ho tema “International Criminal Law and also Prosecuting of Child Sex Abuse’’ iha Dili, loron 04, fulan-Abríl, tinan 2019, iha Otél Timor, realiza husi United Nations Investigative Team for Accountability of Crime commited by Da’esh/ISIL(UNITAD);

Esperiénsia Servisu:

Hahú iha tinan 1991 to’o tinan 1999, nu’udár Funsionáriu Kanwil Departamen Peneregan Republik Indonesia, Dili, Seksaun Relasaun Komunitária (Hubungan Masyarakat /Hupenmas);
Nune’e, iha tinan-1998, Simu kna’ar nu’udár Xefe iha Distritu (Kakandepen Kabupaten) Aileu, to’o tinan 1999 (referendum);
Juíz iha Tribunál Baukau, hahú iha tinan 2000 to’o tinan 2005, nune’e mós simu kna’ar nu’udár Juíz Administradór husi tinan 2000 to’o tinan 2002, Tempu UNTAET;
Aleinde ne’e, Nelson mós nu’udár advogadu privadu durante iha tinan 2006 to’o tinan 2009 iha ne’ebé servisu hamutuk ho atuál Vise-Ministru Justisa, Paulo dos Remédios, no Eskritóriu iha Otél California, Metiaut, Dili;
Nu’udár mós membru efetivu (vogál) Konsellu Superiór Mijistradu Judisiál ne’ebé eleitu husi Prezidente Repúblika, José Ramos Horta, iha tinan 2008;
Entretantu, Nelson hahú servisu iha kareira hanesan Prokuradór Repúblika 3⁰, iha edifísiu Prokuradoria Delegasaun Ermera, iha tinan 2011 to’o tinan 2014;
Nune’e, iha tinan 2016 to’o tinan 2019, Nelson eleitu husi Majistradu sira Ministériu Públiku nian, nu’udár membru efetivu (vogál) Konsellu Superiór Ministériu Públiku nian;
Iha loron 09, fulan-Maiu, tinan 2023, hetan fali nomeasaun husi Prezidente Repúblika, José Ramos Horta, hanesan Adjuntu-Prokuradór Jerál Repúblika;
Iha Loron 12, fulan-Maiu, tinan 2025, Nelson de Carvalho asumi pasta nu’udár Prokuradór Jerál Repúblika (PJR), iha ne’ebé hetan nomeasaun husi Prezidente Repúblika, José Ramos Horta ba períodu ida, husi tinan 2025 to’o tinan 2029 bazeia ba Dekretu Prezidensiál Nú. 40/2025, 12 Maiu, publikadu iha Jornál Repúblika.