MOP finaliza ona dezeñu estrada husi Luka ba Lakluta
VIKEKE, 13 Maiu 2025 (TATOLI)—Asesór Vise Ministériu Obra Públika (MOP), Rui Hernania Guterres, informa ekipa téknika Ministériu Obra Públika finaliza ona dezeñu estrada husi Luka, postu Vikeke Vila liga ba postu Lakluta.
“Kona-ba estrada husi Luka ba postu Lakluta agora daudaun tékniku MOP finaliza ona dezeñu, ita hein loke konkursu ba públiku hodi konkore ba obra estrada Lakluta. Enkuantu, estrada seluk ne’ebé besik finaliza ona mak estrada Uatukarbau liga ba Baguia-Baukau purvolta kilométru 20 no dezeñu besik ramata iha tempu badak,” nia dehan ba Agência Tatoli, ohin.
Nia hatutan, Governu Konstituisionál da-sia (IX) ida-ne’e kontinua atensaun ba estrada Asalaitula to’o Ossú kilométru 12 ninian ne’e, ninia prosesu besik tama ba implementasaun obra.
“Estrada sira-ne’ebé seidauk klaru mak estrada iha Vikeke Vila laran, ita haree estrada iha Vila laran sente triste loos. Tanba estrada referida ko’ak barak-liu difikulta movimentu sira iha kapitál Vikeke,” nia hateten.
Enkuantu, estrada husi Uatukarbau ba Ilomar (Lautein), Uatukarbau ba Uatulari, Uatulari liga ba Vikeke Vila, Vikeke Vila ba Natarbora sei implementa iha tinan ida-ne’e.
“Ba estrada sira iha Vikeke ne’ebé atu tama ba implementasaun ne’e iha intervensaun Ministru sempre hateten beibeik katak iha tinan ida tenke implementa. Depois ba tinan oin ne’e ita foku ba supervizaun. Nune’e ita espera ita-nia di’ak sei mai daudaun,” nia hateten.
Iha fatin seluk, Xefe suku Dilór, postu Lakluta, Jacinto Ximenes, husu aselera kontrusaun estrada Lakluta ne’ebé kada tinan sempre fó impaktu ba komunidade iha postu Lakluta ninia movimentasaun ba-mai Vikeke Vila.
“Tan ne’e, Governu presiza aselera prosesu ba implementa tanba estrada ne’ebé liga ba ami-nia postu kuandu tempu udan sempre ponte kotu, estrada kotu, entaun ita-nia povu mak enfrenta beibeik difikuldade. Hanesan agora daudaun ponte Sumaku no ponte Eutua kotum entaun halo normalizasaun emerjénsia de’it hodi komunidade bele asesu Estrada,” nia dehan.
Jornalista : Vitorino Lopes da Costa
Editór : Cancio Ximenes
