DILI, 13 Maiu 2025 (TATOLI)–Embaixadora Asuntu Mudansa Klimátika Austrália nian, Kristin Tilley, tersa ne’e, hasoru malu ho Prezidente Repúblika José Ramos Horta hodi ko’alia kona-ba asuntu mudansa klimátika ne’ebé mundu hasoru espesiál Timor-Leste no Austrália, iha Palásiu Prezidensiál Nicolau Lobato, Bairru Pite, Dili.
“Agradese, ohin, bele hasoru Prezidente Horta hodi ko’alia kona-ba asuntu mudansa klimátika. Mensajen prinsipál, ohin, ha’u hato’o ba Prezidente katak tuir ami nia haree Timor-Leste nasaun ida-ne’ebé importante atu servisu hamutuk ho Austrália hodi haree ba mudansa klimátika,” Kristin hateten ba jornalista sira hafoin ramata enkontru ho Xefe Estadu.
Nia dehan, ba oin, nasaun rua bele haree hamutuk oinsá dalan di’ak-liu atu hetan finansiamentu hodi apoiu ba atividade kona-ba mudansa klimátika.
“Iha hasoru malu ho Prezidente Horta ha’u hato’o katak tinan oin Austrália mak sei sai hanesan uma-na’in ba konferénsia internasionál mudansa klimátika nian iha Austrália atu diskute kona-ba dezafiu no oportunidade saida mak bele servisu hamutuk ba futuru. Ami kontente tebes haree Prezidente Horta ema ida-ne’ebé servisu makaas mós ba mudansa klimátika,” nia dehan.
Aleinde ne’e, Kristin hasoru malu mós ho Ministru Negósiu Estranjeiru no Kooperasaun (MNEK), Bendito Freitas, hodi ko’alia kona-ba Austrália nia kompromisu atu servisu hamutuk ho Governu Timor-Leste iha área mudansa klimátika no mós kompromisu ustrália nian hodi apoia iha mudansa klimátika iha nível globál.
Tuir Kristin Tilley, Timor-Leste hanesan nasaun ki’ik, ninia kontribuisaun ba prodús emisaun ba mudansa klimátika kiik-liu kompara ho nasaun boot sira. Maske rai ki’ik, Timor-Leste mós sei hetan impaktu husi mudansa klimátika.
Tanba ne’e, Governu Austrália iha kompromisu hakarak tulun Governu Timor-Leste iha nível komunidade ho objetivu, atu haforsa sira-nia koñesimentu kona-ba mudansa klimátika no konservasaun bá komunidade sira hodi halo mitigasaun ba mudansa klimátika iha Timor-Leste.
Entretantu, enkontru ne’e akompañadu mós husi Embaixadór Timor-Leste ba Asuntu Mudansa Klimátika, Adão Barbosa, Diretór-Jerál ba Asuntu Multilaterál no Diretór-Jerál ba Ázia no Oseánia, Xefe Gabinete no seluk tan.
Jornalista : Hortencio Sanchez
Editór : Cancio Ximenes
