Ai-moruk multivitamina stock out, sei hatama iha semana ne’e
DILI, 14 Maiu 2025 (TATOLI)—Diretór Servisu Apoiu Diagnóstiku no Terapéutiku Hospital Nacional Guido Valadares (HNGV), Vidal de Jesus Lopes, rekoñese ai-moruk multivitamina stock out iha HNGV no fó ona orientasaun ba Empreza Instana Farmásia atu kompra urjente iha semana ne’e.
“Ai-moruk multivitamina laiha ne’e loos no semana ne’e Empreza Instana Farmásia atu hatama mai iha HNGV,” Vidal de Jesus Lopes dehan ba jornalista sira, iha nia kna’ar fatin, HNGV, Bidau, kuarta ne’e.
Nia haktuir, durante ne’e, fornesedór ne’e husi Institutu Nasionál Farmásia Produtu Médiku (INFPM), maibé kestaun stoke out ne’e, HNGV bele utiliza nia orsamentu hodi kompra liuhusi empreza ne’ebé HNGV halo kontratu mak hanesan Instana Farmásia no Betesda.
Antes ne’e, pasiente Carlito Sousa, preokupa ai-moruk multivitamina iha Hospitál Nasionál Guido Valadares (HNGV), ne’ebé stock out (estoke mamuk) durante fulan rua ona.
“Ha’u mai konsulta ha’u-nia moras ba médiku sira pasa reseita mai ha’u, katak ha’u tenke konsumi multivitamina. Ha’u bá farmásia, sira hatán dehan ai-moruk laiha, entaun ha’u komesa ko’alia lian maka’as uitoan no diskute malu ho sira no sira haruka ha’u bá ko’alia ho xefe departamentu no nia esplika katak multivitamina kuaze fulan ida ka rua hanesan ne’e laiha,” Carlito haktuir.
Jornalista: Felicidade Ximenes
Editór: Xisto Freitas da Piedade
