DILI, 14 Maiu 2025 (TATOLI)—Hosi Janeiru to’o Maiu, tinan ne’e, junta médika iha Hospital Nacionál Guido Valadares (HNGV), aprova ona lista pasiente na’in-50 resin no haruka ona bá Ministériu Saúde (MS) hodi halo transferénsia ba rai-li’ur hodi halo tratamentu saúde.
Diretór Servisu Apoiu Diagnóstiku no Terapéutiku HNGV, Vidal de Jesus Lopes, hateten prosesu junta médika nian halo transferénsia ne’e la’o nafatin, maibé iha limitasaun bazeia ba orientasaun ne’ebé mak iha, tanba Timor-Leste foin halo akordu ho Ospitál KPJ Malázia.
“Prosesu junta médika nian hodi halo transferénsia pasiente la’o hela, más ita limite bazeia ba orientasaun ne’ebé mak iha, tanba ita foin halo MoU (akordu) ho Ospitál KPJ Malázia, iha fulan-Janeiru liubá,” nia dehan ba jornalista, iha HNGV, Bidau, kuarta ne’e.
Nia esplika, akordu ne’ebé Ministériu Saúde ho Ospitál KPJ Malázia ne’e ho tempu naruk, maibé informasaun detallu bele husu iha parte Diresaun Nasionál Apoiu Servisu Ospitalár atu fó resposta klaru.
Nia informa, pasiente na’in-50 resin ne’ebé mak hetan ona aprovasaun ne’e kuaze maioria moras kankru no fuan nian.
“Moras ne’ebé mak barak liu ne’e kankru ho moras fuan. Husi ne’e, pursentu 40 moras kankru, 40% moras fuan no 20% moras sira seluk. Pasiente sira-ne’e kuaze idade hahú husi labarik to’o ferik no katuas,” nia informa.
Antes ne’e, Xefe Interina Departamentu Apoiu Servisu Ospitalár, Zélia Bernardino, hateten durante Janeiru to’o Marsu tinan ne’e, Ministériu Saúde liuhusi Diresaun Nasionál Apoiu Servisu Ospitalár halo ona transferénsia ba pasiente sira hamutuk na’in-31.
“Totál pasiente ne’ebé mak halo ona traferensia bá rai-li’ur durante fulan tolu nian hamutuk na’in-31,” Zélia haktuir.
Entretantu, ospitál ne’ebé pasiente sira halo tratamentu ba mak hanesan iha ospitál Prince Court Medical, Sunway Medical Center, IHAL no KPJ Malázia no Singapura mak ospitál Gleneagles Singapura.
Jornalista: Felicidade Ximenes
Editór: Xisto Freitas da Piedade
