DILI, 14 Maiu 2025 (TATOLI) – Prezidente Parlamentu Nasionál (PPN), Maria Fernanda Lay, subliña katak estabilidade polítika no hametin pás sai fatór determinante ba dezenvolvimentu país nian.
Fernanda Lay hato’o deklarasaun ida-ne’e iha véspera ba komemorasaun Loron Restaurasaun Indepedénsia ba da-23 (20 Maiu 2002-20 Maiu 2025).
“Ha’u espera ita bele iha konxiénsia katak nasaun ida tinan aumenta tenke adultu. Kuandu adultu ita atu halo sasán ruma, ita hanoin tanba ita-nia povu presiza dezenvolvimentu, estabilidade polítika”, PPN hato’o ba Tatoli, ohin.
Tuir Fernanda Lay, bainhira iha estabilidade polítika, Governu bele hala’o nia serbisu ba dezenvolvimentu povu nian, ne’ebé daudaun sira hasoru susar no reklama tenke rezolve sira-nia problema.
Lidér órgaun soberania daruak ne’e dezeja katak restaurasaun indepedénsia tinan ne’e marka tan istória katak, Timor Leste kompremete atu hametin pás iha seiu ASEAN nian.
Deputada ne’e nota tinan 23 Timor-Leste restaura nia indepedénsia, iha parte dezenvolvimentu nasaun nian iha buat balun la’o ho di’ak.
“Ha’u hanoin tinan 20-resin iha buat balun la’o di’ak. Señor Hun Sen [Prezidente Senadu Reinu Kamboja] mai ko’alia PIB [Produtu Internu Brutu] sira-nian bainhira tama iha ASEAN, Kamboja iha dólar rihun 280-resin, nia optimista, masa ita la’e?”, dehan.
Hodi hatutan “ha’u fiar katak, ba oin ita-nia estabilidade polítika ita la han malu, dezenvolvimentu sei la’o ho ita-nia prezensa iha ASEAN, ema estranjeiru de’it mós afirma sira-nia otimizmu, ita mós tenke otimizmu, satan ita-ninia Governu agora ho dezenvolvimentu”, nia salienta.
Nia dehan Parlamentu mak tenke halo nia papél fiskalizasaun hodi garante ezekusaun programa no orsamentu sira husi ezekutivu hodi hala’o dezenvolvimentu.
“Hanesan ha’u hateten beibeik no primeiru-ministru mós hateten tenke garante katak dólar ne’ebé ita gasta ba duni objetivu povu nian. Ema krítika bele, más papél deputadu ba fiskaliza ne’ebé ha’u optimista ami iha team ita bele diferensa mais ita nasaun ida”.
Husu kona-ba tema jerál ba 20 Maiu tinan ne’e, PPN reitera katak estabilidade polítika mak importante. “Seluk, ita la baku-malu, joven la baku-malu, ita sei iha oportunidade atu dezenvolve di’ak liu, ita hotu timoroan. Ha’u mós hakarak di’ak ba Timór, mai ita fó liman hamutuk”, konklui.
Lembra katak Governu deside tema jerál ba komemorasaun Loron Restaurasaun Independénsia 20 Maiu iha tinan ne’e mak “Hametin Pás no Dezenvolvimentu”.
Notísia relevante: Taur Matan Ruak “Ita buka serbisu hamutuk dezenvolve ita-nia rai”
Jornalista: Nelson de Sousa
Editora: Maria Auxiliadora
