DILI, 14 Maiu 2025 (TATOLI) – Konsellu Ministru analiza ona aprezentasaun introdutória ida ne’ebé dirije husi Primeiru-Ministru, Xanana Gusmão, kona-ba Polítika no Planu Asaun Ekonomia Azúl – Promove Ekonomia Tasi ida ne’ebé Reziliente no sustentavel iha Timor-Leste (2025-2030).
Aleinde ne’e analiza mós rejime jurídiku prioritáriu sira ne’ebé sei dezenvolve iha ámbitu ba ninia implementasaun.
Dokumentu husi Governu esplika katak polítika ida-ne’e hakarak atu promove paradigma foun dezenvolvimentu ekonómiku nian, bazeia ba utilizasaun rekursu tasi ne’ebé sustentável, nune’e mós kontribui hodi hadi’a kondisaun moris populasaun sira-nian no prezerva ekosistema sira.
“Bazeia ba polítika no asoins sintegradas lubun ida, ne’ebé foka liu ba tasi, ho objetivu atu apoia dezenvolvimentu ekonómiku no sosiál país nian, bazeia ba prátika ambientál ne’ebé di’ak, ho forma diversifikada, sustentavel no inkluziva, ne’ebé garante ekilíbriu ba tempu naruk ekosistema no rekursu tasi nian”, nota ne’e dehan.
Iha ámbitu husi ninia elaborasaun, sei opromove prosesu konsulta públika ida ne’ebé luan, ne’ebé sei inklui ho munisípiu sira ne’ebé iha tasi, organizasaun naun-governamentál no parseiru dezenvolvimentu, ho objetivu atu rekolle kontributu no garante envolvimentu husi setór hotu-hotu sosiedade nian.
TATOLI
