DILI, 14 Maiu 2025 (TATOLI) – Konsellu Ministru (KM) revoga Dekretu Governu n.u 25/2021, loron 10 fulan-Novembru, no halakon Unidade Misaun ba Jestaun Integrada Projetu Internasionál Aeroportu Internasionál Prezidente Nicolau Lobato (UMGIP, iha portugés).
Ministru Transporte no Komunikasaun, Miguel Manetelu, hateten unidade ne’e, kria tuir akordu finansiamentu ho Banku Aziátiku Dezenvolvimentu, nunka instala ka hala’o atividade ruma.
Ninia estinsaun ne’e hanesan rezultadu aprovasaun, iha loron 7 fulan-Maiu tinan 2025, tuir konseitu foun ida ba projetu aeroportu nian no nesesidade hodi garante jestaun inisiativa ida ne’ebé lais, efetivu no efisiente liu.
“Ita revoga tiha para simplifika nia prosesu UMGIP ne’e, ita la uza ona dekretu Governu mais ne’e ita nomeia bazeia ba despaixu konjuntu husi ministru sira ne’ebé ninia ema envolve iha Project Management Unit ne’e, revoga de’it ida-ne’e”, nia esplika iha Palásiu Governu, ohin.
Iha enkontru Konsellu Ministru, governante ne’e mós informa atu koordena ho Ministériu Administrasaun Estatál para haree programa ida ba 20 Maiu nian.
“Atividade ne’e oinsá, tanba hanoin atu halo lansamentu ba primeira pedra ba konstrusaun ba aeroportu. Pur ezemplu, 20 de Maiu labele, ami muda ba 21 la’e 22 Maiu. Data mak tuir malu ne’e ona”, informa.
Jornalista: Arminda Fonseca
Editora: Maria Auxiliadora
