DILI, 15 Maiu 2025 (TATOLI) – Profesór Doutór, Aurélio Guterres, konsidera revizaun ba estatutu foun Universidade Nasionál Timor Lorosa’e (UNTL) nesesáriu nune’e bele hadi’a di’ak liután universidade públika ne’e iha futuru.
“Estatutu ne’e halo tinan 15 ona ne’ebé presiza halo ajustamentu tuir nesesidade ne’ebé iha. Revizaun estatutu ne’e hanesan prosesu normál. Ita-nia esperansa ba estatutu foun ne’e oinsá atu ba oin bele hadi’a universidade, nune’e mós buat ne’ebé di’ak ona ita sei hadi’a di’ak liután, no buat ne’ebé seidauk halo presiza halo,” Aurélio Guterres dehan ba Tatoli, iha UNTL Kaikoli, Dili, kinta ne’e.
Nune’e estatutu foun ne’e bele fó dalan atu hili reitór foun ba mandatu tuir mai. Estatutu foun ne’e nia regra ne’e klaru tiha ona tanba kuandu atu lidera universidade tenke ema ho nível doutoramentu.
Ministériu Ensinu Superiór Siénsia no Kultura (MESSK), José Honório da Costa Pereira Jerónimo, informa, reitór UNTL ho ekipa ba aprezenta estatutu UNTL ba Konsellu Ministru no hetan ona aprovasaun.
“Estatutu ne’e loke dalan ba dosente doutoramentu sira iha UNTL atu kandidatu ba reitór,” Ministru José informa.
Nia dehan, rezolusaun ne’e iha mós kritéria ida katak sé mak atu kandidatu ba reitór UNTL mak profesór sira iha UNTL ne’ebé hakarak kandidatu, bele kandidatu laiha kritéria ida atu bandu sira.
“Iha mudansa uituan kona-ba dekanu, dekanu laiha ona eleisaun iha fakuldade maibé reitór eleitu mak sei nomeia dekanu bazea ba proposta mai husi fakuldade,” nia realsa.
Governante ne’e hatutan, rezolusaun ne’e rekoñese mós sentru lubuk ida ne’ebé UNTL iha hanesan, sentru koreanu, sentru japones no sentru sira seluk tán ne’ebe eziste tau hotu iha estatutu ne’ebé ohin Konsellu Ministru aprova ona.
“Ita hein de’it ona atu submete fali prezidente Konsellu Ministru depois ba Primeru Ministru no bele submete ona Prezidente Repúblika atu promulga,” nia katak.
Alterasaun sira-ne’e ho objetivu atu otimiza jestaun universidade, promove interdixiplinaridade ne’ebé boot liu iha ensinu no investigasaun, no garante utilizasaun rekursu ne’ebé di’ak liu.
Estatutu anterior UNTL nian, Dekretu-Lei n. 16/2010, loron 20 fulan-Outubru, sei revoga bainhira diploma ida-ne’e tama iha vigór.
Antes ne’e Governu liuhusi reuniaun Konsellu Ministru aprova projetu dekretu lei estatutu foun universidade nasionál Timor Lorosa’e ne’ebé aprezenta husi Ministru Ensinu Superiór, Siénsia no Kultura, José Honório da Costa Pereira Jerónimo no Reitór UNTL, João Soares Martins.
Jornalista : Osória Marques
Editór: Evaristo Soares Martins
