DILI, 15 Maiu 2025 (TATOLI) – Komemorasaun loron restaurasaun independénsia Timor-Leste nian ba da-23, Governu halo Espozisaun Governasaun Lokál hodi konvida kada munisípiu sira mai aprezenta sira-nia produtu lokál, artezenatu, no aprezenta progresu serbisu sira durante halo ona iha munisípiu sira.
Ministru Administrasaun Estatál, Tomas Cabral, hateten iha tuku 17h00 lorokraik ne’e, Prezidente Repúblika, José Ramos Horta, sei halo abertura ba espozisaun ne’e iha Portu Dili.
Governante ne’e esplika katak objetivu husi espozisaun ne’e atu hatene kona-ba durante tinan ida-resin munisípiu sira halo atividade saida, tanba Governu Sentrál fó kompeténsia ba sira atu halo asisténsia téknika iha serbisu sira iha munisípiu.
“Sermónia espozisaun ne’e ita sei hahú ohin no ramata iha 20 Maiu 2025″, Tomas Cabral hateten iha Pantai Kelapa, Dili.
Iha sorin seluk, Prezidente Autoridade Munisípiu Manufahi, Luís Tavares, hateten sira-nia parte hetan duni konvite husi Ministériu Administrasaun Estatál atu partisipa iha espozisaun ne’e hodi aprezenta progresu serbisu kada munisípiu ka Governu lokál nian no demostra produtu lokál.
Nia hateten kona-ba progresu serbisu parte munisípiu Manufahi rasik sei aprezenta progresu serbisu kona-ba infraestrutura realsiona ho ministériu obra públika, saúde, edukasaun, agrikultura no seluk tan.
“Progresu serbisu sira ne’e orsida ita sei aprezenta lihusi vídeo ne’ebé ami prepara ona iha fatin espozisaun ne’ebé partisipante sira bele haree ,inklui mós bele vizita ami-nia website munisípiu nian, tanba progresu serbisu ami sei tau hotu iha ne’ebá”, dehan.
Nia hatutan relasiona ho progresu serbisu munisípiu Manufahi nian, iha mudansa tanba daudaun komunidade agrikultura hahú reativa natar foun sira, halo to’os, no abitante sira hela iha parte foho hahú hadi’a sira-nia produtu kafé hodi hasa’e nia produsaun no sira tan.
Parte saúde nian, antes ne’e, sentru saúde balu falta pesoál no ekipamentu, maibé daudaun ne’e aumenta ona.
Iha edukasaun nian iha mudansa, tanba númeru estudante aumenta, maneira apreendizajen hahú hadi’ak no merenda eskolár ne’e edukasaun esforsu atu ezekuta ho másima.
“Ita koko atu saúde, agrikultura, edukasaun, serbisu hamutuk ba iha programa Governu Sentrál nian, liuliu merenda eskolár atu bele akumula ai-han lokál sira hodi oferese ba ita-nia estudante sira”, dehan.
Kona-ba produtu lokál ne’ebé parte munisípiu Manufahi prepara iha espozisaun mak hanesan ai-farina, fehuk ne’ebé tranaforma ba dosi, fore-rai sai marmelada, kafé, no seluk tan.
Notísia relevante: Ermera – Bobonaro preparadu partisipa espozisaun nasionál iha portu Dili
Jornalista: Arminda Fonseca
Editora: Maria Auxiliadora
