DILI, 15 Maiu 2025 (TATOLI) – Governu liuhusi Ministériu Administrasaun Estatál, Sekretariadu Servisu Kooperativa ne’ebé sai hanesan komisaun organizadora ba preparasaun loron restaurasaun independénsia nasionál Timor-Leste ba da-23 gasta verba ho montante rihun US$ 500 hodi garante susesu komemorasaun loron istóriku no importante ne’e.
Sekretáriu jerál Komisaun organizadora MAE, Angelo Urbano Fernandes informa, preprasaun ba selebrasaun loron 20 de Maiu nian daudaun ne’e atinje ona 80%.
“Selebrasaun loron 20 de Maiu ida-ne’e ita sei realiza iha Palásiu Prezidensiál no eventu ida-ne’e mós ita konsidera halo simples de’it, no daudaun ne’e ita iha hela Portu Dili hodi halo mós preparasaun ba espozisaun feira nasionál nian”, Sekretáriu jerál Angelo Urbano Fernandes informa ba jornalista TATOLI iha Portu Dili, ohin.
Sekretáriu jerál ne’e informa, aleinde ne’e ekipa tékniku balun mós ba haree preparasaun iha Palásiu Prezidensiál tanba atividade espesiál ne’e iha ne’ebá, tanba ne’e sira fahe ekipa hodi tau-matan ba preparasaun sira-ne’e.
“Kona-ba atividade hasa’e bandeira nian ne’e, Timór-Leste festeza iha Dili, maibé kada munisípiu mós nafatin hasa’e bandeira no sei dirije husi Prezidente autoridade munisípiu ida-idak nian”, nia énfaze.
Nia mós hatutan katak sira ekipa Korpu Isár Bandeira Nasionál (CIBN-sigla portugés) mós daudaun ne’e prepara hela, sira dadeer-dader ba treinu iha Lauhata, Líkisa, tanba sira mak sei dirije isár bandeira iha Palásiu Prezidensiál.
Entretantu, totál orsamentu ba gastu komemorasaun loron nasionál ho kuantia rihun US$ 500 ne’e kompostu mós ho osan ne’ebé distribui ba iha kada munisípiu hodi partisipa iha espozisaun feira nasionál. Orsamentu sira-ne’e mós koloka ona ba iha seksaun lojístika, seksaun litúrjia, seksaun konsumu inklui seksaun sekretáriu hodi imprime konvite no banner sira.
Notísia relevante:Feira nasionál iha portu Dili sei aberta husi PR ba públiku
Jornalista: Alexandra da Costa
Editór: Rafael Ximenes de A. Belo
