DILI, 15 Maiu 2025 (TATOLI) – Membru Komisaun A iha Parlamentu Nasionál (PN) ne’ebé trata Asuntu Konstitusionál no Justisa halo diskusaun iha faze espesialidade ba proposta lei númeru 10/VI (1a) – Rejime Jurídiku Garantia Mobiliáriu ba loron datoluk nian iha Maubara, Likisá, ohin.
Iha inísiu diskusaun espesialidade deputadu sira aprezenta proposta alterasaun 32, atu armoniza artigu sira ne’ebé presiza no la muda polítika ka konteúdu ba proposta lei ne’ebé Governu aprezenta.
Proposta lei númeru 10/VI (1a) iha artigu hamutuk 81 no tuir giaun deputadu sira diskute espesífiku kada artigu inklui proposta alterasaun sira.
Ba diskusaun espesialidade to’o iha meudia ne’e deputadu sira aprova ona lei ne’e to’o artigu 58. Diskusaun ne’e lidera direta husi Prezidente Komisaun A, Patrocínio dos Reis Fernandes, no Vise-Prezidente Komisaun, António Verdial de Sousa.
Iha diskusaun ne’e partisipa mós husi deputadu membru Komisaun D ne’ebé trata Asuntu Ekonomia no Dezenvolvimentu.
Deputadu sira halo diskusaun kle’an kada artigu ne’ebé hato’o mós hanoin no preokupasaun balun hodi bele prodús lei ne’e ho kualidade hodi lori benefísiu ba operadór ekonómiku sira ne’ebé responde mós husi reprezentante Governu no entidade relevante sira.
Tuir testu inisiál proposta lei ne’ebé aprezenta husi Governu ho nia artigu hamutuk 81, hahú husi Kapítulu I kona-ba Dispozisaun Jerál ho nia artigu haat, Kapítulu II mak Konstituisaun Direitu Garantia ho artigu sia, Kapítulu III sobre Efikásia Direitu Garantia Kontra Terseiru ho artigu hitu.
Kapítulu IV Sentrál Rejistu Informasaun kona-ba Garantia Mobiliáriu ho artigu ida, Kapítulu V Prioridade Direitu Garantia ho artigu 16. Kapítulu VI Direitu no Obrigasaun ba Parte no Terseiru Obrigadu ho artigu haat. Kapitulu VII Ezekusaun Direitu Garantia ho artigu 14.
Kapítulu VIII Implementasaun ho artigu rua, Kapítulu IX Dispozisaun Tranzitóriu no Finál ho artigu hitu.
Rekorde katak, iha 14 Abríl 2025, Parlamentu liuhusi reuniaun plenária aprova proposta lei númeru 10/V (1a) iha faze jeneralidade ho votu afavór 39, kontra 0 no abstensaun 14.
Notísia relevante: https://tatoli.tl/2025/04/14/pn-aprova-proposta-lei-garantia-mobiliariu-iha-faze-jeneralidade/
Jornalista: Nelson de Sousa
Editora: Maria Auxiliadora
