Komisaun G husu labele diskrimina ema ho defisiénsia
DILI, 15 Maiu 2025 (TATOLI) – Prezidente Komisaun G Parlamentu Nasionál (PN) ne’ebé ne’ebé trata Asuntu Edukasaun, Juventude, Kultura no Sidadania, Armando Lopes, husu ba parte hotu labele halo diskriminasaun ba ema ho defisiénsia (Ehd).
Nia hato’o kestaun ne’e ligada ba deputadu balun ne’ebé foin lalais levanta iha plenária kona-ba preokupasaun estudante ida ho kondisaun defisiénsia, ne’ebé foti programa estudu enfermajen, semestre III, iha Universidade Nasionál Timor Lorosa’e mak de repente dosente hasai ho razaun kestaun fízika.
“Ami sei bolu reitór UNTL atu informa maizumenus rekezitu saida mak sira uza bainhira simu estudante sira, liuliu ba kontinua iha enfermajen ida-ne’e mak ami prepara hela atu bolu hodi hatene kle’an, tanba tama ona semestre III, de repente ita hasai ne’e sente ladún di’ak”, nia hato’o.
Tuir nia, edukasaun ne’e ba ema hotu-hotu no labele iha diskriminasaun. “Maibé, tanba sá iha enfermajen ida-ne’e mosu preokupasaun sira hasai to’o agora seidauk kontinua nia estudu”, nia kestiona.
Hodi haktuir katak “ami komunika ona ba estudante ne’e, iha segunda [semana oin] nia mai hasoru ami atu hetan informasaun molok halo investigasaun ba UNTL ne’ebé halo asaun ida-ne’e”.
Ho kestaun ne’e, jornalista Tatoli tenta konfirma ho Reitór UNTL, João Soares Martins, iha nia knaaar fatin, kampus sentrál, maibé labele fó komentáriu tanba okupadu ho serbisu seluk.
Jornalista: Nelson de Sousa
Editora: Maria Auxiliadora
