Pesoál saúde animál Vikeke na’in-neen iha Uatulari seidauk simu saláriu
VIKEKE, 15 Maiu 2025 (TATOLI)—Pesoál saúde animál postu Uatulari, munisípiu Vikeke, Agapito da Silva, informa funsionáriu ka pesoál saúde animál na’in-neen (6) iha Uatulari hahú asina kontratu iha fulan-Fevereiru 2025 maibé besik fulan neen ona seidauk simu sira-nia direitu (saláriu).
Notísia Relevante: Pesoál saúde animál Vikeke na’in-14 ativa fali servisu
“Ami asina kontratu iha fulan-Fevereiru maibé to’o agora ami seidauk simu saláriu. Maske, ami seidauk simu saláriu maibé ami kontinua servisu halo atendementu ba komunidade nia animál sira-ne’ebé moras iha postu Uatulari,” Agapito da Silva hateten ba Agência TATOLI iha postu Uatulari, ohin.
Agapito hatutan, saláriu la tama ne’e sai hensan dezafiu ba pesoál saúde animál sira, maibé hanesan timoroan nafatin hala’o kna’ar hodi atende komunidade ne’ebé animál moras.
“Durante ami-nia saláriu la tama, ami sente sai hanesan dezafiu ida maibé ami nafatin ho espirítu hala’o ami-nia servisu. Kona-ba saláriu ne’e ami hato’o ona ba servisu agrikultura munisípiu, maibé sira dehan hein de’it,” nia haktuir.
Iha fatin seluk, diretór servisu agrikultura munisípiu Vikeke, Olivio Soares Freitas, haktuir kona-ba funsionáriu pesoál saúde animál ne’ebé destaka iha munisípiu Vikeke ne’ebé seidauk simu saláriu ne’e agora prosesu ona ba Ministériu Finansa, nune’e sira-nia saláriu sei tama iha fulan-Juñu.
“Ha’u haree horisehik funsionáriu sira-nia lista hatama ona ba Ministériu Finansa ne’ebé sira-nia saláriu sei tama iha fulan oin. Funsionáriu saúde animál ne’ebé seidauk simu saláriu hamutuk na’in-neen (6) no na’in-tolu (3) kontratu husi nasionál no na’in-tolu (3) mak kontratu husi servisu agrikultura iha munisípiu,” nia dehan.
Nune’e, nia husu, funsionáriu saúde animál sira kontinua hala’o servisu hodi hein prosesu pagmentu sira-ne’ebé daudaun ne’e sei prosesu Ministériu Finansa.
Notísia Relevante: Progresu konstrusaun Klínika Saúde Animál Uatulari atinji 100%
Jornalista : Vitorino Lopes da Costa
Editór : Cancio Ximenes
