DILI, 15 Maiu 2025 (TATOLI) – PLAN Internasionál kontinua promove advokasia ba inkluzasaun sosiál liuhusi konferénsia internasionál ho tema “Hakotu barreira no haforsa diversidade iha Timor-Leste”, ho objetivu atu fó espasu importante ba juventude no komunidade sira atu partilla esperiénsia, aumenta koñesimentu no buka solusaun koletiva atu kombate diskriminasaun.
Diretora interina PLAN Internasionál Timor-Leste, Fátima Estrela Soares informa katak konferénsia internasionál ne’e hetan fundu husi Uniaun Europeia no implementa husi PLAN Internasionál ho parséria Arkuíris no mós Asosiasaun Halibur Defisiénsia Matan Timor-Leste (AHMDTL) inklui parseiru dezenvolvimentu sira.
“Objetivu atividade ne’e atu lori stakeholder (parseiru) sira hanesan komunidade husi munisípiu no mós entidade liña ministeriál nian hodi diskute no haree kona-ba progresu sira-ne’ebé mak ita halo ona no dezáfiu ne’ebé ita hasoru Liuliu ba ema ho diversidade sira hanesan defisiénsia no LGBTQI ”, Diretora ne’e informa ba jornalista sira iha salaun Delta Nova, Komoro, Dili, ohin.
LGBTQI ne’e katak Lesbian, Gay, Bisexual, Transgender, Queer or Questioning, no Intersex.
Nune’e, halibur malu iha konferénsia ne’e ne’e hodi haree barreira sira-ne’ebé iha ba solusaun alternativu ida ba planu saida mak sei implementa loron tuirmai.
“Ita bele haree polítika ne’ebé bele fó espasu ba sira, no mós dezenvolvimentu inkluzivu ne’ebé mak di’ak liu ba futuru”, dirijente ne’e hatutan.
PLAN implementa projetu ida hodi empodera família ema ho diversidade nian atu hatene kle’an kona-ba sira-nia direitu no projetu ne’e implementa iha munisípiu tolu hanesan Ainaru, Aileu no Dili.
“Tanba ita hakarak ema hotu-hotu moris ho respeita dignidade iha ita-nia nasaun rasik liuhusi dalan advokasia. Entaun, ida-ne’e mak ita halo ba iha komunidade sira, aleinde ne’e ita mós haforsa sira oinsá sira bele haforsa ekonomia ne’ebé reziliénsia liu”, nia aprofunda.
Nia akresenta katak durante PLAN ninia atividade, Uniaun Europeia aleinde apoiu fundu sira mós sempre apoiu servisu sira hanesan implementasaun ba programa direitu labarik nian, programa haforsa mudansa klimátika no mós projetu sira seluktan.
Enkuantu, tuir Embaixadór Uniaun Europeia, Lotam Lerer, PLAN hanesan sira-nia kolega atu apoia promove inkluzasaun iha Timor-Leste no projetu ida-ne’e atinje ona rezultadu ne’ebé di’ak. “Entaun liuhusi konferénsia ida-ne’e atu aprende no selebra rezultadu sira-ne’ebé mak atinji husi implementa projetu ida-ne’e”, embaixadór ne’e informa.
Nia hatutan, UE la’ós de’it apoia fundu maibé mós implementadór sira seluk liuhusi apoia polítika hodi promove diversidade no hakuak inkluzaun sosiál, tanba sira-nia lema dehan diversidade katak unidu iha diversidade.
Partisipante ba atividade ne’e kompostu husi grupu sira hanesan PDHJ, AHMDTL, Arcoiris, lideransa komunitária, estudante universitáriu, no parseiru nasionál inklui internasionál.
Verba ba atividade ne’e Uniaun Europeia no atividade ne’e rasik sei hala’o durante loron loron rua.
Entretantu, durante atividade ne’e la’o kada grupu parseria nasionál sira halo espozisaun artezanatu no obra fotografia sira.
Jornalista: Alexandra da Costa
Editór: Rafael Ximenes de A. Belo
