PNDS 2025: Suku Builo sei fó prioridade konstrui estrada ba aldeia rua
VIKEKE, 15 Maiu 2025 (TATOLI)—Xefe suku Builo, postu administrativu Ossú, munisípiu Vikeke, Helio Ximenes de Fereira, hateten Programa Nasionál Dezenvolvimentu Suku (PNDS) ba tinan 2025 ne’e suku Builo sei fó príoridade ba konstrui estrada liga ba aldeia rua.
“Planu príoridade PNDS ba ami-nia suku halo estrada husi suku Builo ba aldeia rua hanesan aldeia Buareka no Builo ho totál metru 700. Tanba dalan ba aldeia rua ne’e kondisaun ladi’ak, iha tempu udan sempre difikulta ba ita-nia komunidade nia movimentu lori produtu lokál asesu ba merkadu. Tan ne’e, ami planeia konstrui estrada ho beton atu ita-nia komunidade asesu,” Helio Ximenes de Fereira hateten ba Agência TATOLI, iha postu Ossú, ohin.
Autoridade suku Builo ne’e hatutan, konstrusaun estrada ho beton metro 700 ba aldeia rua ne’e prevee orsamentu PNDS ho totál hamutuk $23,000.
“Kontrusaun iha tinan ida-ne’e, orsamentu aloka ona maibé ami sente orsamenu la sufisiente, tanba uluk orsamentu normál matadalan PNDS rihun $40,00-resin. Maibé, orsamentu agora tun liu ne’ebé difikulta ba implementasaun projetu referida,” nia dehan.
Nia dehan, bainhira implementa estrada ba aldeia rua konstrui hotu sei ajuda komunidade tanba agora daudaun ne’e estrada kondisaun ladi’ak, komunidade hatudu ba sira-nia aldeia tenke para karreta no motorizada sira iha sedu suku nian.
“Ita-nia komunidade sira la’o ain ba sira uma kuaze kilómetru rua resin, maibé ita hahú uluk konstrui metru 700 bazeia ba ita-nia orsamentu ne’ebé aloka mai suku, ita sei halo fazeadamente. Ida-ne’e sai hanesan difikuldade tebes ba ita-nia komunidade suku Builo. Nune’e implementasaun estrada mak halo ona ne’e ita bele dehan ajuda ona ita-nia komunidade,” nia hateten.
Tuir dadús populasaun iha aldeia Builo ho totál uma-kain 96 no totál populasaun hamutuk rihun 400, ne’ebe kompostu husi aldeia Buareka totál uma kain 75 ho totál populasaun hamutuk rihun 200.
Jornalista : Vitorino Lopes da Costa
Editór : Cancio Ximenes
