PR halo abertura ba feira nasionál iha Portu Dili
DILI, 15 Maiu 2025 (TATOLI)—Prezidente Repúblika (PR), José Ramos Horta, kinta ne’e, halo abertura ba feira nasionál hodi komemora loron Restaurasaun Independénsia RDTL ba dala XXIII, 20 Maiu 2025, iha Portu Dili.
“Ita mai halo abertura feira ida-ne’e atu komemora ita-nia loron Restaurasaun Indepedénsia ba dala XXIII, nune’e ha’u agradese ba Prezidente Autoridade sira, Xefe Suku no Xefe Aldeia sira-nia prezensa iha eventu referidu,” José Ramos Horta dehan iha nia deskursu iha feira nasionál ne’ebé organiza husi liña ministeriál hanesan Ministériu Administrasaun Estatál, Ministériu Komérsiu no Indústria no sira seluk.
Nia hato’o agradesimentu ba Governu nia inisiativa hodi loke feira ida-ne’e atu nafatin hametin pás no dezenvolvimentu ba rai ida-ne’e.
“Ha’u agradese ba Governu ne’ebé inisiativa realiza seremónia ida-ne’e hodi hatudu progresu sira. Ita haree tema ida-ne’e hateten Hametin pás no dezenvolvimentu, katak hadi’a nafatin ita-nia nasaun sai di’ak iha pás nia laran,” nia afirma.
Notísia relevante: Feira nasionál iha portu Dili sei aberta husi PR ba públiku
Iha fatin hanesan, Ministru Administrasaun Estatál, Tomás do Rosário Cabral, hateten partisipante iha espozisaun ne’e maihusi munisípiu 12 inklui mós administrasaun Ataúru no espozisaun ida-ne’e mós atu hato’o ba públiku katak durante mandatu tinan ida resin saida mak autoridade munisipál sira dezenvolve ho servisu sira ne’ebé entrega ona bá sira.
“Delegasaun territoriál ne’ebé iha hetan mós apoiu husi liña ministeriál sira-ne’ebé hanaran grupu tékniku permanente ba prosesu desentralizasaun podér lokàl. Tinan 2027 ita sei iha primeiru munisípiu. Avaliasaun dezempeñu hala’o ona iha 2024 no entrega tiha ona ba munisípiu sira atu sira bele halo reajustamentu delegasaun ne’ebé ita fó bá sira,” Tomás Cabral esplika.
Nia relata, espozisaun ne’e sei hahú ohin no sei ramata iha loron 20 Maiu tinan ne’e, marka mós prezensa Ministériu Komérsiu Indústria no iha tenda hamutuk 150 mak prenxe iha espozisaun ba artezanatu sira, iha mós kulinária tradisionál sira.
“Espozisaun munisipál sira sei aprezenta sira-nia servisu no aprezenta mós kulinária iha sira-nia fatin, nune’e husu entidade sira atu bá vizita sira-nia tenda. Iha eventu ne’e sei iha mós kompetisaun dansa kultura ne’ebé kada munisípiu sei hatudu, no kompetisaun stand kada munisípiu nian sei avalia husi Sekretaria Estadu Arte no Kultura,” Cabral informa.
Entretantu, aleinde Prezidente Repúblika, marka mós prezensa Primeiru-Ministru, Xanana Gusmão no entidade Governu sira hodi halo vizita ba kada stand munisípiu nian, simu ho tara tais no lian dadolin.
Jornalista: Felicidade Ximenes/Alexandra da Costa
Editór: Xisto Freitas da Piedade
