DILI, 15 Maiu 2025 (TATOLI) – Relasiona ho kazu kona-ba kobransa ilegál no asédiu seksuál ne’e, Reitór Universidade Nasionál Timor Lorosa’e (UNTL), João Soares Martins, hatete problema iha Fakuldade Medisina Siénsia Saúde (FMSS), tenke iha baze no evidénsia ruma nune’e universidade bele foti medida.
“Problema iha-ne’e tenke iha nia baze no iha evidénsia ka prova atu ita fó medida, mas ita defama ema iha públiku, ha’u hanoin dehan ne’e laloos. Maibé ha’u simu tiha ona relatóriu husi dekana horiseik no ha’u sei estuda aban bainrua sei ko’alia ho estrutura fakuldade hodi haree,” Reitór UNTL, ko’alia iha resintu UNTL.
Maibé nia prefere, estudante nia devér mak tenke estuda no estuda tanba importante liu estudante sira hatene nia-an katak sira-nia dever mai estuda.
Antes ne’e Portavoz Estudante, FMSS, Germano dos Santos Moreira, konsidera, Dekana Fakuldade Medisina Siéncia Saúde hatudu nia inkapasidade no sai protetór ba profesór balun ne’ebé prátika kazu asédiu seksuál, kobransa ilegál no viola norma UNTL nian.
“Dekana Fakuldade Medicina e Ciencia da Saude hatudu nia inkapasidade no sai protetór ba profesór balun ne’ebé prátika kazu asédiu seksuál, kobransa ilegál no violadór norma UNTL nian. Ida-ne’e hatudu katak dekana rasik admite atu kazu hirak-ne’e akontese, maske ita-nia prinsípiu, valór no regulamentu sira bandu atu labele akontese iha universidade,” Porta voz Estudante Germano liuhusi Konferénsia Imprensa iha kampus UNTL Kaikoli, Dili segunda (12/05).
Tanba ne’e, rekomenda ba Reitór UNTL, atu foti medida urjente ba kazu referidu no xamada urjentimente ba dekana, Diretór Departamentu Parteira Profesór Rafael no Diretór ESTES, iha ne’ebé tenta ignora kazu ne’ebe estudante sira hasoru.
Jornalista : Osória Marques
Editór: Evaristo Soares Martins
