UNICEF sei sosa tipu vasina lima ba Timor-Leste
DILI, 15 Maiu 2025 (TATOLI)—Fundu Nasaun Unida ba Labarik (UNICEF-sigla inglés) iha Timor-Leste daudaun ne’e prosesa hela sosa vasina lima ho orsamentu liu rihun $800 ba Timor-Leste.
Reprezentante UNICEF iha Timor-Leste, Patrizia Di Giovanni, haktuir katak Governu Timor-Leste, liuhusi Institutu Nasionál Farmaséutiku no Produtu Médiku (INFPM), transfere ona fundu refere ba UNICEF hodi sosa tipu vasina lima iha nasaun Copenhagen.
“Tipu vasina ne’ebé oras ne’e daudaun UNICEF prosesa hela mak Tablet Hepatitis B ki’ik hamutuk 5.750, Tablet Vasina Bacillus Calmette Guerin (BCG) ki’ik hamutuk 18.840, Tablet Vasina Pentavalente ki’ik hamutuk 16.050, Tablet Vasina HPV ki’ik 56.730, Tablet Vasina Difteria ki’ik 2.600 (T) no Tablet Vasina PCV ki’ik 20.050,” Patrizia Di Giovanni hateten ba jornalista sira, iha nia kna’ar fatin, Kaikoli, kinta ne’e.
Nia esplika katak UNICEF sempre sosa vasina tuir pedidu husi Governu Timor-Leste tanba vasina ne’e sosa ho osan Governu rasik.
“UNICEF só ajuda sosa vasina ne’e, tanba vasina ne’e sosa la liuhusi ema negosiante no sosa liuhusi UNICEF nia folin baratu liu no asesível liu,” nia hateten.
Patrizia Di Giovanni hatutan, prosesu entrega vasina ne’e lori fulan tolu to’o haat resin atu to’o iha Timor-Leste, tanba prosesu entrega tenke kuidadu liuhusi prepara transporte ne’ebé adekuadu, sosa vasina ne’ebé kualidade diretamente husi fábrika, nune’e labele kaduka lalais.
“Ita mós tenke kuidadu bainhira sosa vasina sira, tanba vasina ne’e mós iha prazu. Nune’e bainhira sosa vasina ne’e ita mós ezamina to’o bainhira mak bele uza,” nia esplika.
Husu kona-ba bainhira mak vasina lima ne’e sei to’o iha Timor Leste, liu-liu vasina Rotavirus no DT ne’ebé oras ne’e daudaun estoke laiha ona iha Sentru Saúde Timor-Leste, nia subliña katak sosa ne’e agora daudaun sei iha hela prosesu nia laran, no UNICEF tenta nune’e iha tinan 2025 vasina lima ne’e sei to’o iha Timor-Leste.
Jornalista: Felicidade Ximenes
Editór: Xisto Freitas da Piedade
