BTL, E.P identifika fasilidade sistema bee-moos Vikeke Vila ladun di’ak
VIKEKE, 15 Maiu 2025 (TATOLI)—Koordenadór Bee Timor Leste, Empreza Públika (BTL, E.P) munisípiu Vikeke identifika fasilidade sistema bee-moos iha kapitál Vikeke Vila maioria kondisaun aat, hodi difikulta distribuisaun bee-moos ba komunidade.
Koordenadór BTL, E.P Vikeke, Marito da Costa, relata distribuisun bee-moos iha kapitál munisípiu Vikeke la’o ladun di’ak tanba tanke rezervatóriu ne’ebé kontrui iha tempu Portugés, kanu distribuisaun husi bee-matan Loihunu to’o iha tánke rezervatóriu sentrál instala iha tinan 1996 ne’ebé labele ona distribui bee ba komunidade sira iha kapitál Vikeke laran.
“Ita-nia tanke rezervatóriu no kanu distribuisaun ne’e antigu ona tanba instala iha tempu okupsaun Portugés no Indonézia nian ne’ebé ita uza to’o agora. Entaun kanu sira-ne’e agora fwrujen no aat hotu ona, nune’e ita-nia bee ne’ebé distribui ne’e lakon hotu kanu sira iha rai okos, difikulta distribuisaun bee ba ita-nia komunidade atu asesu,” Marito da Costa hateten ba Agência TATOLI, iha nia kna’ar fatin Beloi, ohin.
Marito hatutan, BTL, E.P Vikeke ona master plan reabilitasaun ba sistema bee-moos iha kapitál Vikeke Vila nian, maibé seidauk hetan aprovasaun husi Governu tanba ne’e mk seidauk halo manutensaun ba kanu no aánke rezervatóriu sira.
“Planu ba manutensun ba sistema bee-moos iha kapitál Vikeke ne’e nian ami prepara tiha ona, maibé ita-nia Governu sei pending hela. Ita espera ba oin Governu tau orsamentu hodi hadi’a kanu tanke rezervatóriu sira, atu fornese bee ba ita-nia komunidade,” nia dehan.
Kona-ba tanke rezervatóriu, nia dehan, ba kapitál Vikeke kapasidade fornese bee tanke rezervatóriu ba uma kain-500, maibé agora uma kain aumenta ba1.000, difikulta distribuisaun ba uma kain hotu-hotu iha Vikeke Vila.
“Nune’e, ba futuru mak ita halo konstrusaun foun ba sistema bee-moos sira iha kapitál Vikeke ne’e, ha’u sente ita-nia komunidade bele asesu hotu ba bee-moos,” nia dehan.
Tuir dadus bee urbana iha kapitál munisípiu Vikeke BTL, E.P instala ona metru kontadór hamutuk 703 no uma-kain hamutuk 500 seidauk monta kontadór tanba debitu bee mak la sufisiente.
Jornalista : Vitorino Lopes da Costa
Editór : Cancio Ximenes
