DILI, 16 Maiu 2025 (TATOLI) – Xefe Bankada CNRT, Duarte Nunes, husu timoroan hotu atu kontinua haklean pás hodi bele lori dezenvolvimentu ba país.
Xefe bankada hato’o apelu ne’e relasiona ho Timor-Leste ne’ebé sei komemora loron restaurasaun indepedénsia ba da-23 (20 Maiu 2002-20 Maiu 2025) ho tema jerál “Hametin Pás no Dezenvolvimentu”.
“Pás laiha, dezenvolvimentu laiha. Ita nasaun ki’ikoan ida hanoin pás ne’e karik ita hotu hakarak ita bele hetan, tanba ita mai husi funu ida. Agora, ita hetan indepedénsia atu ita dezenvolve”, hateten.
Tanba ne’e, nia husu sidadaun hotu kontribui hodi hakle’an pás no lori dezenvolvimentu, tanba tinan 23 nasaun kontinua hasoru dezáfiu balun hanesan falta postu traballu ba joven sira.
Deputadu ne’e dehan, loron restaurasaun indepedénsia nu’udar momentu espesiál ne’ebé hamosu hanoin filafali buat ne’ebé hafoin funu naruk ida hetan indepedénsia.
“Loron ida-ne’e ita tenke hanoin indepedénsia ne’ebé ita hetan no hanoin mós kontribuisaun ema barak fó sira-nia vida ba rai ida-ne’e”, relembra.
Deputadu Duarte hato’o nia observasaun ba tinan 23 Timor-Leste ninia dezenvolvimentu katak hatudu progresu, ezemplu iha parte setór infraestrutura la’o ho fazeadamente ne’ebé hanesan baze ida bele fasilita movimentu populasaun nian.
Iha setór edukasaun no saúde mós la’o, mezmu iha problema balun ne’ebé presiza hadi’a, liuliu iha parte jestaun no Governu ida-ne’e mai ho ninia programa no hein katak mandatu tinan lima bele mellora setór hirak ne’e.
Ba área agrikultura mós iha progresu, tanba daudaun Governu komesa hadi’a irrigasaun sira hanesan parte ida bele hasa’e liután produsaun rai-laran.
Notísia relevante: Restaurasaun independénsia ba da-23 nu’udar momentu reflesaun
Jornalista: Nelson de Sousa
Editora: Maria Auxiliadora
