KOVALIMA, 16 Maiu 2025 (TATOLI) – Administradór Postu administrativu Maukatar, Laurentino de Jesus informa katak autoridade postu anima komunidade atividade desportu komunitáriu iha ámbitu komemorasaun loron restaurasaun independénsia 20 Maiu ba da-23, iha Postu administrativu Maukatar, Munisípiu Kovalima.
Autoridade postu Maukatar dehan, Maukatar hala’o atividade desportu komunitáriu ne’e tanba hetan apoiu orsamentu husi Ministériu Juventude Desportu Arte no Komunitária (MJDAK) hamutuk US$ 3,500.
“Orsamentu ne’ebé apoiu husi MJDAK ami hala’o atividade desportu komunitària mak hodi anima komunidade sira”, Autoridade postu Maukatar Laurentino de Jesus informa ba TATOLI, iha BNU Kovalima nia oin, ohin.
Ho orsamentu ne’ebé iha autoridade postu hala’o desportu komunitàriu ohin tama ona semi-finál, maratona, tata berlindu no seluktan.
Autoridade postu organiza eventu Desportu komunitáriu ne’e bazeia ba programa MJDAK nian. “Atu komemora 20 maiu ami halo ona preparasaun hodi harii tenda ba VIP no ba komunidade sira ne’ebé tuir planu serimonia isar bandeira sei hala’o iha suku Ogues”, nia informa.
Razaun postu Maukatar hala’o seremónia isar bandeira iha suku sira tanba ho hanoin atu autoridade sira nune’e komunidade bele iha koñesementu kona-ba loron nasionál sira.
Entretantu, komemorasaun loron importante no istóriku – loron restaurasaun independénsia ba tinan ida-ne’e nia tema mak “Hametin pás no dezenvolvimentu nasionál”.
Jornalista:Celestina Teles
Editór: Rafael Ximenes de A. Belo
