DILI, 16 Maiu 2025 (TATOLI) – Ministériu Edukasaun (ME), aloka osan konsesaun eskolár ba eskola Ensinu Tékniku Vokasionál iha territóriu ho montante kuaze rihun $800.
“Ha’u ko’alia kona-ba tékniku vokasionál nian orsamentu ba konsesaun eskolár ba tinan ida-ne’e ita fahe ba kategoria rua ida mak konsesaun eskolár duni no ida mak fundu operasionál eskolár ne’e. Ne’ebé konsesaun eskolár ba eskola tékniku vokasionál ne’e ita distribui ba eskola 30 ona,” Diretór Nasionál Ensinu Tékniku Vokasionál, Fernando Mouzinho, dehan iha nia knaar fatin Vila Verde, sesta ne’e.
Nia esplika, eskola ESTV ne’ebé hetan subvensaun públika mak eskola ESTV lima iha territóriu, maibé ba eskola públiku de’it, ESTV privada iha nia orsamentu ketak ne’ebé na’in bele jere mesak.
“Fundu operasionál ne’e foin mak ba eskola lima, liuliu ba eskola tékniku vokasionál Atabae, Leorema, Vikeke depois eskola rua husi agrikultura nian,” nian dehan.
Nia hatutan, eskola agrikultura uluk Ministériu Agrikultura mak kaer hanesan Moleana no Natarbora.
“Ne’ebé eskola lima ne’e ita bolu dehan fundu operasionál, orsamentu ida-ne’ebé ita fó la’ós konsesaun eskolár maibé subvensaun publika”.
“Ita haree ba kursu ne’ebé iha entaun ita fó subsídiu, sira jere atubele rezolve sira-nia problema. Orsamentu ne’e bele apoiu ba matéria eskola no asuntu administrasaun sira no nesesidade eskola sira,” nia katak.
Nia esplika, kada eskola ne’e nia kuantidade osan la hanesan tanba nesessidade kursu ne’ebé kada eskola iha la hanesan. Porezemplu, ba eskola tékniku vokasionál Atabae porvolata rihun 20, depois Leorema mós nune’e.
“Agora ba ESTV Moleana ho Natarbora ne’e boot entaun aloka rihun $100-resin. Tanba estudante hotu-hotu hela iha asrama. Entaun ita tenke fó subsídiu ba sira, ne’e haree ba sira-nia alimentasaun depois subsídiu ba manutensaun, depois balun sira bele halo rekrutamentu ba funsionáriu administrasaun iha eskola atu jere sira-nia eskola ne’ebé oramentu ne’e boot,” nia dehan.
Jornalista : Osória Marques
Editór: Evaristo Soares Martins
